भूकम्प प्रभावितलाई नमूना घर हस्तान्तरण

रुकुम पश्चिम र जाजरकोट जिल्लाका चार भूकम्प प्रभावित परिवारको लागि निर्माण गरिएका नमूना घर प्रभावित परिवारलाई हस्तान्तरण गरिएको छ । 

शनिबार रुकुम पश्चिमको आठबिसकोट नगरपालिका १४ छेपारे निवासी बिपेन्द्र जैसी, सोहि नगरपालिका १३ भल्माका हरिजंग मल्ल, जाजरकोटको भेरी नगरपालिका १ पिपे निवासी बबिता राना र सोहि वडाको सानोपुल रिम्ना निवासी परिमले रानालाई नमूना घर हस्तान्तरण गरिएको हो । 

बेलायती राजदूतावास एफसीडीओको सहयोगमा राष्ट्रिय विपद् जोखिम न्यूनिकरण तथा व्यवस्थापन प्राधिकरणको नेतृत्वमा राष्ट्रसंघीय निकायहरुको साझेदारीमा सञ्चालित संयुक्त पुनर्लाभ कार्ययोजना अन्तर्गत यी भवन तयार भएका हुन् । नमूना आवास अन्तर्गत तयार गरिएका यी भवनहरु सिएसईबी प्रविधिमा आधारित रहेका छन् । 

अन्तराष्ट्रिय आप्रवासन संगठन (आईओएम) का आवास संयोजक चेरी अबिला, गैर सरकारी संस्था महासंघ रुकुम पश्चिम अध्यक्ष भिमराज ओली, स्थानीय जनप्रतिनिधिहरु लगायतले आज एक कार्यक्रमका बिच औपचारिक रुपमा प्रभावित परिवारलाई घर हस्तान्तरण गर्नुभएको हो । 

बलियो र सुरक्षित निजि आवास सम्पन्न गरेर औपचारिक रुपमा हस्तान्तरण गरिएको बताईएको छ । यी घरहरुमा वातावरणमैत्री इट्टाको प्रयोग गरेर भूकम्प प्रतिरोधी बनाईएको छ। नमूना आवासका लागि तयार गरिएको घरहरुमा दुई वटा कोठा रहेका छन् भने एक शौचालय रहेको छ । 

घर हस्तान्तरण कार्यक्रममा भूकम्प प्रभावित हरिजंग मल्लले भूकम्पपछि घरबासविहिन भएको आफ्नो परिवारले सुरक्षित घर पाएको भन्दै खुशी व्यक्त गर्नुभयो । मल्ल अपाङगता भएका व्यक्ति हुुनुहुन्छ । भूकम्पले घर भत्काएपछि बास र गासको खोजिमा उहाँको श्रीमती तीन छोरी र दुई छोरासहित काम खोज्दै घर छोड्नु भएको थियो ।

“म अस्थायी टहरामा ओत लागेर बसे, कहिले छिमेकीको घरमा खाए कहिले भोकै सुते,” मल्लले भन्नुभयो “मेरो नमूना घर बनेको खबर छोराछोरीले सुनेपछि घर आउन आतुर भएका छन्, यो मेरो परिवारको लागि ठुलो खुशी हो ।” उहाँको एक छोरा बहिरा (फरक क्षमता) भएका व्यक्ति हुनुहुन्छ । श्रीमतीले मजदुरी गरेर छोराछोरीको लालनपालन गरिरहनुभएको छ । 

छेपारे गाउँकी सरस्वती जैसीले नमूना घरले भूकम्पको पीडामा मल्हम लगाएको बताउनुभयो । भूकम्पबाट बुहारी र तीन नातीनातिनी गुमाउनुभएकी जैसीका  श्रीमानको मृत्यु भएको बर्षदिन बित्न नपाउँदै बिरामीको कारण जेठो छोरा पनि गुमाउनुपरेको थियो । उहाँका माईला छोरा बिपेन्द्र पनि भूकम्पपछि नियमित औषधि उपचारमै हुनुहुन्छ । भूकम्पको बेला घाईते अवस्थामा उद्धार गरिएकी जैसीको स्वास्थ्य अवस्था समेत कमजोर बन्दै गएको उहाँले जनाउनुभयो । 

नमूना आवास प्राप्त गर्नुभएकी जाजरकोट पिपे गाउँकी बबिता राना एकल महिला हुनुहुन्छ । दुई छोराको साथ बस्दै आउनुभएकी उहाँको घर भूकम्पले पूर्ण रुपमा क्षती गरेको थियो । त्यसैगरी सानोपुल रिम्नाका परिमले राना शारिरीक रुपमा अशक्त एकल पुरुष हुनुहन्छ । उहाँको आर्थिक अवस्था एकदमै कमजोर रहेको छ । 

आईओएमले स्थानीय तहको सिफारिसका आधारमा जाजरकोट र रुकुम पश्चिममा २३ वटा नमूना घर निर्माण सुरु गरेको थियो । जाजरकोटमा १२ वटा र रुकुम पश्चिममा ११ वटा नमूना घर निर्माण गर्ने क्रममा चार वटा निर्माण सम्पन्न भएर हस्तान्तरण गरिएको हो भने बाँकि आवासहरु निर्माण सम्पन्न हुने चरणमा रहेको बताईएको छ ।