आठविसकोटमा जल उत्पन्न प्रकोप सम्बन्धी सचेतना कार्यक्रम

रुकुम पश्चिमको आठविसकोट नगरपालिकामा जल उत्पन्न प्रकोप सम्बन्धी सचेतना तथा अनुशिक्षण कार्यक्रम सञ्चालन भएको छ । 

सशस्त्र प्रहरी बल ४७ नम्वर गुल्म रुकुमपश्चिमले आठविसकोट नगरपालिकाको सहयोगमा अनुशिक्षण सञ्चालन गरेको हो । सोमबार देखि राडि ज्यूला शिक्षा क्याम्पसमा भईरहेको अनुशिक्षण कार्यक्रम भोलि बुधबार सम्म चल्ले बताईएको छ । 

जल उत्पन्न प्रकोप न्युनिकरण तथा नियन्त्रणका लागि उक्त कार्यक्रम गरिएको हो । कार्यक्रममा नगर कार्यपालिकाका सदस्यहरु, नगर प्रहरी, स्थानीय विपद् व्यवस्थापन समितिका पदाधिकारीहरु, राजनीतिक दलका प्रतिनिधिहरु लगायतको सहभागिता रहेको छ । 

आठविसकोट नगरपालिका प्रमुख रबि केसीले भूकम्पले थिलोथिलो पारेको नगर क्षेत्रका विभिन्न स्थानहरु जोखिपूर्ण अवस्थामा रहेकोले क्षती न्यूनिकरणका लागि पूर्व तयारी र सचेतना आवश्यक रहेको बताउनुभयो । उहाँले विपद्को जुनसुकै बेला विपद् आउनेसक्ने भएकोले सचेतनाका कार्यक्रमहरु समुदायस्तरमा समेत आवश्यक रहेको औल्याउनुभयो । 

आठविसकोट नगरपालिकामा आपतकालिन सञ्चार केन्द्र निर्माण गरिएको जानकारी दिनुहुँदै नगर प्रमुख केसीले विगतका घटनाहरुको कारण विपद्को सामना गर्न नगरपालिका तयारीमा रहेको बताउनुभयो । उहाँले सबै मिलेर विपद्को सामना गर्न एकजुट हुनुपर्नेमा जोड दिनुभयो । 

कार्यक्रमको सहजीकरण सशस्त्र प्रहरी बल ४७ नम्वर गुल्म रुकुमपश्चिमका सशस्त्र प्रहरी निरीक्षक झक्कु प्रसाद शर्मा र सशस्त्र प्रहरी नायब निरीक्षक मधु गौतमले गरिरहनुभएको छ । उहाँहरुले सैद्धान्तिक तथा प्रयोगात्मक अभ्यास मार्फत जल उत्पन्न प्रकोप व्यवस्थापन र नियन्त्रणका उपायहरु सिकाईरहनुभएको आठविसकोट नगरपालिकाका शिक्षा अधिकृत ईन्द्र बहादुर बिष्टले जानकारी दिनुभयो । 

कार्यक्रममा विपदको पुर्व तयारी, खोज तथा उद्धार, पुनस्र्थापना, पुनर्निर्माण, मनोवैज्ञानिक परामर्श, पृष्ठपोषण लगायतको विषयमा सहजिकरण गरिएको छ । यसका साथै जोखिमपुर्ण इलाकाको पहिचान, सञ्चार, पानी र पिउने पानी र  खाद्यन्न व्यवस्थापन, जोखिमपुर्ण वस्तीहरुलाई स्थानान्तरण गर्ने, अत्यावश्यक औषधी र प्राथामिक उपचार सम्वन्धीको वारेमा समेत जानकारी गराईएको छ । 

शिक्षा अधिकृत ईन्द्र बहादुर बिष्टले सञ्चालन गर्नुभएको कार्यक्रमको अध्यक्षता विपद् व्यवस्थापन समितिका संयोजक यज्ञ बहादुर बिकले गर्नुभएको थियो भने प्रमुख आतिथ्यता नगर प्रमुख रबि केसीको रहेको थियो । 

यस अघि सशस्त्र प्रहरी बलले चौरजहारी नगरपालिका वडा नम्वर ५ खहरेमा रहेको माध्यामिक विद्यालयका कक्षा ९ र १० मा अध्ययनरत विद्यार्थीहरुका विचमा उक्त जनचेतनामुलक कार्यक्रम सम्पन्न गरेको थियो।

सम्बन्धित समाचार ...

• प्रकोप सम्वन्धी जनचेतना जगाउँदै सशस्त्र प्रहरी बल