वातावरण संरक्षणका सवालमा वक्तृत्वकला, सोलाबाङमा प्रभातफेरि

‘हाम्रो भूमि हाम्रो भविष्य’ भन्ने नाराका साथ बुधबार विश्व वातावरण दिवस मनाईएको छ । यस अवसरमा रुकुम पश्चिममा ‘वातावरण संरक्षणमा बिद्यार्थीको भूमिका’ बिषयमा वक्तृत्वकला प्रतियोगिता सम्पन्न गरिएको छ । 

डिभिजन वन कार्यालय रुकुम पश्चिम र बाल कल्याण माध्यमिक विद्यालयको आयोजनामा मुसिकोट नगरपालिका -४ सोलाबाङस्थित बाल कल्याण माविमा उक्त प्रतियोगिता सम्पन्न गरिएको हो । प्रतियोगितामा मुसिकोट नगरपालिका भित्रका माध्यमिक तहमा विभिन्न विद्यालयमा अध्ययनरत १४ जना बिद्यार्थीहरुले भाग लिएका थिए । 

प्रतियोगितामा महाकाली माविका छात्रा कृतिका खड्काले प्रथम स्थान हाँसिल गर्नुभएको छ । त्यसैगरी बाल कल्याण मावि सोलाबाङका छात्रा मोनिका ओली द्धितीय, महेन्द्र माविका छात्र बिशेष निधि पुन तृतीय र बाल कल्याण मावि झुल्खेतका छात्र प्रदिप ओलीले सान्त्वना स्थान प्राप्त गर्नुभएको छ । 

उत्कृष्ट स्थान ल्याउन सफल प्रतियोगिहरुलाई क्रमश पाँच हजार, चार हजार, तीन हजार र दुई हजार नगर पुरस्कारका साथ प्रमाणपत्र र डायरी प्रदान गरिएको बालकल्याण मावि सोलाबाङका प्रधानाध्यापक भक्तबहादुर खड्काले जानकारी दिनुभयो । प्रधानाध्यापक खड्काका अनुसार प्रतियोगितामा सहभागी सबै बिद्यार्थीहरुलाई यातायात खर्च र डायरी उपलब्ध गराईएको छ । 

कार्यक्रममा डिभिजन वन कार्यालयका निमित्त प्रमुख शेरबहादुर परियारले पृथ्वीलाई स्वच्छ राख्दा नै भविष्य सुरक्षित हुन्छ भन्ने सन्देश दिन विश्व व्यापि रुपमा दिवस मनाईएको बताउनुभयो । उहाँले वातावरण संरक्षणका लागि सबैले आआफ्नो स्थानबाट सकारात्मक पहल गर्न आवश्यक रहेको उल्लेख गर्नुभयो ।

निमित्त प्रमुख परियारले जथाभावि फोहोर नगरेपछि र घर वरपर सफा राखेपछि वातावरण स्वच्छ हुने भएकोले वातावरणको स्वच्छताको लागि सबैले सोच्न आवश्यक रहेको जनाउनुभयो । पृथ्वीको तापक्रम बढ्दै गईरहेको प्रशंग उल्लेख गर्नुहुँदै उहाँले वन फडानी रोक्न, नदिनाला स्वच्छ बनाउन जरुरत रहेको बताउनुभयो । 

दिसवका अवसरमा बुधबार बिहान मुसिकोट नगरपालिका ४ स्थित सोलाबाङ बजारमा प्रभातफेरि गरिएको छ । सन्देशुलक ब्यानर, प्लेकार्डसहितको उक्त प्रभातफेरिमा बिद्यार्थी, शिक्षक, महिला समुह, सहकारी, नेपाल प्रहरी, विभिन्न निकायमा कार्यरत कर्मचारीहरु लगायतको सहभागिता रहेको थियो ।