सल्यानमा मिनी ट्रक दुर्घटना : चालकको मृत्यु, सहचालक घाईते

गए राति सल्यानमा मिनी ट्रक दुर्घटना हुँदा चालकको मृत्यु भएको छ । 

दाङबाट सल्यान आउँदै गरेको रा १ ख १९१६ नम्बरको मिनी ट्रक गए राति करिब १० बजेतिर राप्ती राजमार्गअन्तर्गत कपुरकोट गाउँपालिका –३ अरिङ्गालेफेदीमा दुर्घटना हुँदा छत्रेश्वरी गाउँपालिका–६ का २६ वर्षीय सुकलाल घर्तीको मृत्यु भएको प्रहरीले जनाएको छ । 

दुर्घटनमा परेर बनगाड कुपिण्डे नगरपालिका –९ सेराका २१ वर्षीय सहचालक तेजबहादुर बुढाथोकी घाइते हुनुभएको जिल्ला प्रहरी कार्यालय सल्यानका सूचना अधिकारी प्रहरी निरीक्षक भवानीप्रसाद धमलाले बताउनुभयो ।

चालक घर्तीको ट्रकले च्यापिएर दुर्घटनास्थलमै मृत्यु भएको हो । घाइते बुढाथोकीको श्रीनगरस्थित अस्पतालमा उपचार भइरहेको छ ।

ट्रक अनियन्त्रित भई सडकबाट करिब ३ मिटर तल खसेको बताईएको छ । मृतक घर्तीको शव पोष्टमार्टमका लागि सल्यान जिल्ला अस्पताल राखिएको प्रहरीले जनाएको छ ।