सानीभेरीमा बोलेरो दुर्घटनाको मुख्य कारण 'क्षमता भन्दा तेब्बर' यात्रु 

आईतबार बिहान रुकुम पश्चिमको सानीभेरी गाउँपालिका ६ मा दुर्घटना भएको डबल क्याप बोलेरो जीपले क्षमता भन्दा तेब्बर बढी यात्रु बोकेको तथ्य खुलेको छ । 

सानीभेरी गाउँपालिका ६ मा लु १ च ६०२९ नम्वरको डबल क्याप बोलेरो जीप दुर्घटना भएको हो । वडा नम्वर ६ को कोटगाउँबाट पालिकाको केन्द्र सिम्लीतर्फ आउँदै गरेको लु १ च ६०२९ नम्वरको डबल क्याप बोलेरो वडा कार्यालय नजिकै दुली सिम्ली जोड्ने भित्रि सडकखण्डमा दुर्घटना भएको थियो ।

दुर्घटनामा परेर चालकसहित दुई जनाको घटनास्थलमै मृत्यु भएको थियो भने १२ जना घाईते भएका थिए । एक जना भने सकुशल रहेका थिए । 

जिल्ला प्रहरी कार्यालयका प्रमुख प्रहरी नायब उपरीक्षक बेदबहादुर पौडेलले क्षमता भन्दा बढी यात्रु बोकेको जीप तिब्र गतिमा रहेको, बाटो साँघुरो र ओरालो रहेकोले दुर्घटना भएको जानकारी दिनुभयो । उहाँका अनुसार उक्त जीपको क्षमता पाँच जनाको मात्रै हो । 

भौगोलिक हिसाबले दुर्गम स्थानमा रहेको उक्त क्षेत्रमा प्रहरी चौकी समेत छैनन् । सवारी धनिहरु यात्रुको सुरक्षित यात्रातर्फ गम्भिर नभएको, यात्रुहरु पनि गन्तव्यमा जानैपर्ने बाध्यता देखाउने भएकोले क्षमता भन्दा बढी यात्रुहरु गाडीमा चढ्ने गरेका छन्  ।

प्रहरीले ट्राफिक चेकजाँच, सचेतनाका कार्यक्रम पनि तिब्र पारिरहेको छ । तर प्रहरीकै आँखा छलेर गर्ने नियम उल्लंघनका घटनाहरुले ठुलो क्षति निम्त्याउने गरेका छन् ।

यस अघि पनि गत भदौ ७ गते सहचालकले चलाएको गाडीले ठक्कर दिदाँ  सानीभेरीको सिम्लीमा दुई आमाछोरीको घटनास्थलमै मृत्यु भएको थियो । रुकुममा गाडीको ठक्करबाट आमा छोरीको घटनास्थलमै मृत्यु

आज बिहान पनि क्षमता भन्दा तेब्बर यात्रु बोकेको बोलेरो दुर्घटना हुँदा ठुलो क्षति भएको हो । डिएसपी पौडेलका अनुसार दुर्घटनामा परेर त्रिवेणी गाउँपालिका वडा नम्वर १ निवासी जीप चालक २७ वर्षीय सुन्दर खड्का र सानीभेरी गाउँपालिका वडा नम्वर ६ निवासी १६ वर्षीया प्रेमकला पुनको घटनास्थलमै मृत्यु भएको छ ।  

जीपमा सवार मध्य चार जनालाई हेलिकप्टरमार्फत सुर्खेत लिईएको थियो । सात जनाको अवस्था मध्यम, एक जनाको अवस्था सामान्य र एक जना भने सकुशल रहेको प्रहरीले जनाएको छ । 

सानीभेरी गाउँपालिका ६ निवासी गाडी धनि ३८ वर्षीय बलबहादुर पुन, सोही ठाउँमा १५ वर्षीय पूर्णबहादुर जैसी, ५० वर्षीया कौशिला पुन मगर र १५ वर्षीया खिमला पुनलाई थप उपचारको लागि नेपाली सेनाको हेलिकप्टरमार्फत सुर्खेत पठाईएको छ ।

गाडी धनी बलबहादुरलाई थपउपचारको लागि सुर्खेतबाट नेपालगज लिईएको छ भने अन्य तीन जनाको कर्णाली प्रदेश अस्पताल सुर्खेतमा उपचार भईरहेको छ । 

त्यसैगरी सोहि वडाका २० वर्षीया अन्जना पुन, ५० वर्षीया बिर्मी खत्री, १५ वर्षीया बिबिशा पुन मगर, १५ वर्षीय बिशाल बिक, ९ बर्षिय शिशिर पुन, २० वर्षीय रिता पुन मगर, जाजरकोटको शिवालय गाउँपालिका निवासी १७ वर्षीया ज्ञानु पुन मगरलाई उपचारको लागि चौरजहारी अस्पतालमा लिईएको छ । यी घाईतेहरु मध्य अन्जना, बिशाल र ज्ञानुको अवस्था गम्भिर रहेको सानीभेरी गाउँपालिकाले जनाएको छ । 

गाउँपालिकाका अनुसार जीपमा सवार सानीभेरी गाउँपालिका ६ का १० वर्षीय रमेश कुसारीको भने अवस्था सामान्य रहेको छ । उनको सानीेभेरी गाउँपालिका अस्पतालमा उपचार भईरहेको छ । सोही स्थानका नविन देवकोटालाई भने सामान्य उपचारपछि डिस्चार्ज गरिएको छ ।  

दुर्घटनाको सूचना लगत्तै जिल्ला प्रहरी कार्यालयबाट प्रहरी नायब उपरीक्षक बेदबहादुर पौडेल र सशस्त्र प्रहरी बल नेपाल ४७ नम्वर गुल्मबाट प्रहरी सहायक निरीक्षक मधु गौतमको कमाण्डमा प्रहरी टोली घटनास्थल पुगेको थियो । प्रहरी र स्थानीयले घाईतेहरुको उद्धार गरेर सानीभेरी गाउँपालिका अस्पताल पुर्याएका थिए । 

सम्बन्धित समाचारहरु :

सानीभेरीको कोेटगाउँबाट सिम्ली आउँदै गरेको जीप दुर्घटना, २ जनाको घटनास्थलमै मृत्यु

सानीभेरी दुर्घटना अपडेट : मृतकको पहिचान खुल्यो, चार जना गम्भिर घाईतेलाई हेलिकोप्टमार्फत उद्धारको तयारी

जीप दुर्घटनाका चार घाईतेलाई हेलिकोप्टरमार्फत सुर्खेत र सात जनालाई चौरजहारी अस्पताल लिईयो (विवरणसहित)