सोसल मिडिया
रुकुम पूर्वको भूमे गाउँपालिका –९ चुन्बाङ जोड्नलाई चार पक्कि पुल एक साथ निर्माण सम्पन्न भएका छन् । सडक पुल निर्माण पश्चात गाउँपालिका केन्द्र र जिल्ला सदरमुकाम रुकुमकोटसम्म सहज यातायात सेवा हुने भन्दै स्थानियवासीहरु खुसी भएका छन् ।
सडक पूर्वाधार विकास कार्यालय रुकुम पूर्वले चुन्बाङमा चार वटा मोटरेवल पुल निर्माण गरेको हो । चुन्बाङका विभिन्न चार स्थानमा आरसिसी पुल निर्माण गरेको सडक पूर्वाधार विकास कार्यालय रुकुम पूर्वका कार्यालय प्रमुख थम प्रसाद पाण्डेयले जानकारी दिनुभयो । उहाँका अनुसार यस आर्थिक वर्षको चैत महिनामा चार वटा पक्कि पुलको निर्माण सकिएको हो ।
चुन्बाङ (बञ्चरे खोला) सडक पुल, च्याङचुङ खोला (लङजुला) सडक पुल, च्याङचुङ खोला (लाखर) सडक पुल र च्याङचुङ खोला (च्याङचुङ) सडक पुल तोकिएको मितिमै निर्माण भएका हुन् । यी योजना निर्माणको ठेक्का पाएका निर्माण व्यवसायीले तोकिएको मितिमै काम सम्पन्न गरेको कार्यालय प्रमुख पाण्डेयले बताउनुभयो ।
उहाँका अनुसार चुन्बाङ (बञ्चरे खोला) सडक पुल निर्माणको ठेक्का हिम शिखर हिरा सप्लासर्य ईन्जिनियरिङ जे.भि.ले पाएको थियो । २५ मिटर लामो उक्त सडक पुल निर्माणका लागि जे.भि.ले तीन करोड ९६ लाख २५ हजार रुपियाँमा २०७९ चैत ७ गते सम्झौता गरेको थियो ।
त्यसैगरी २०७९ चैत २ गते च्याङचुङ खोला (लङजुला) सडक पुल निर्माणको लागि राजबिर निर्माण सेवा रोल्पासँग ठेक्का सम्झौता भएको थियो । तीन करोड ७१ लाख १५ हजार १५८ रुपियाँमा उक्त पुल निर्माणको लागि सम्झौता भएको थियो । उक्त पुलको लम्बाई १६ मिटर रहेको छ ।
च्याङचुङ खोला (लाखर) सडक पुलको ठेक्का कालापानी किरण जे.भि.ले पाएको थियो । यो पुल निर्माणका लागि तीन करोड ३१ लाख चार हजार ५३२ रुपियाँमा ठेक्का सम्झौता भएको सडक पूर्वाधार विकास कार्यालय रुकुम पूर्वले जनाएको छ । १४ मिटर लामो उक्त सडक पुल निर्माणका लागि २०७९ चैत १२ गते उक्त सम्झौता भएको थियो ।
त्यसैगरी २०७९ चैत १२ गतेकै दिन च्याङचुङ खोला (च्याङचुङ) सडक पुल निर्माणको लागि राजबिर निर्माण सेवा रोल्पासँग ठेक्का सम्झौता भएको थियो । तीन करोड ५२ लाख रुपियाँमा उक्त पुल निर्माणको लागि सम्झौता भएको थियो । उक्त पुलको लम्बाई १४ मिटर रहेको छ ।
चार वटै पुल तोकिएको समयमै निर्माण पुरा भएको सडक पूर्वाधार विकास कार्यालय रुकुम पूर्वका सूचना अधिकारी विकास गौतमले बताउनुभयो । उहाँका अनुसार सम्झौता मितिमै निर्माण व्यवसायीले काम सम्पन्न गरेकोले म्याद थप लगायतका कार्य गरिरहन परेन ।
बञ्चरे खोलामा पुल निर्माण भएपछि दुईखोली – बाघमारा – चुन्बाङ सडकखण्डमा जोडिएका छन् भने लङजुला, लाखर र च्याङचुङ खोलामा सडक पुल निर्माण हुँदा चुन्बाङ– कोर्जा– महत सडकखण्ड जोडिएका छन् ।
पुल निर्माण पश्चात यातायात सेवा सहज हुने भन्दै स्थानीयवासीले खुशि व्यक्त गरेका छन् । भुमे गाउँपालिका वडा नम्वर ९ का वडा अध्यक्ष बिनोद बुढाले बिकट चुन्बाङ गाउँलाई जिल्ला सदरमुकाम रुकुमकोटसँग सडक सञ्जाल मार्फत जोड्न महत्वपूर्ण काम सम्पन्न भएको बताउनुभयो । उहाँका अनुसार एकै साथ चार वटा पक्कि पुल निर्माण हुनु विकासको उदाहरणिय पक्ष हो ।
भूमे गाउँपालिका वडा नम्वर ६ र ८ जोड्ने दोमैस्थित थबाङखोलामा पुल निर्माण नुहँदा भने चुन्बाङवासीले रुकुमकोटसम्म सिधा सडक सेवा पाउन सकिरहेका छैनन् । यस स्थानमा पुल निर्माण भएमा चुन्बाङदेखि रुकुमकोटसम्मको सडकखण्ड पुर्ण हुने वडा अध्यक्ष बुढाले उल्लेख गर्नुभयो ।
सडक पूर्वाधार कार्यालयका सूचना अधिकारी विकास गौतमका अनुसार दुई वर्ष पहिला नै दोमैस्थित थबाङखोलामा पुल निर्माणका लागि डिपिआर सम्पन्न गरिएको हो । डिपिआर भैसक्दा पनि आवश्यक बजेट व्यवस्थापन हुन नसक्दा दोमैमा पुल निर्माणको काम अघि बढ्न नसकेको गौतमले जानकारी दिनुभयो । यस स्थानमा सडक पुल अत्यावश्यक रहेको उहाँको भनाई छ ।
