गत कात्तिक १७ गते गएको भूकम्पबाट प्रभावित रुकुम पश्चिमका २९ हजार बढी लाभग्राहीको खातामा अस्थायी आवास निर्माणको लागि रकम जम्मा गरिएको छ । २९ हजार १३३ जना लाभग्राहीको खातामा पहिलो किस्ता वापतको अनुदान रकम जम्मा गरिएको हो । 

जिल्ला प्रशासन कार्यालयका अनुसार हालसम्म जिल्लामा ३१ हजार ६२० जना लाभग्राही कायम भएका छ । सहायक प्रमुख जिल्ला अधिकारी प्रवेश बढुवालले लाभग्राही कायम भएका सबैको लागि सम्बन्धित स्थानीय तहको विपद् व्यवस्थापन कोषमा जिल्ला विपद् व्यवस्थापन समितिबाट रकम निकाशा पठाईसकिएको बताउनुभयो । 

स्थानीय तहहरुले भने २९ हजार १३३ लाभग्राहीको खातामा जनहि २५ हजार रुपियाँको दरले ७२ करोड ८३ लाख २५ हजार रुपियाँ जम्मा गरेका हुन् । जिल्ला विपद् कोषबाट भने ७९ करोड पाँच लाख रुपियाँ निकाशा भइसकेको छ । अस्थायी आवासको लागि निकाशा गरिएको ६ करोड २१ लाख ७५ हजार रुपियाँ स्थानीय तहको कोषमै रहेको छ । 

सरकारले दिएको उक्त अनुदान रकमबाट जिल्लाका छ वटा स्थानीय तहमा २४ हजार ७२६ वटा अस्थायी टहरा निर्माण भएका छन् । सहायक प्रमुख जिल्ला अधिकारी बढुवालले पाँच हजार ४९३ अस्थायी टहरा निर्माणकै चरणमा रहेको बताउनुभयो । उहाँका अनुसार आठविसकोट नगरपालिकामा आठ हजार ११ वटा, चौरजहारी नगरपालिकामा पाँच हजार ३६२ वटा र मुसीकोट नगरपालिकामा ६३७ वटा अस्थायी आवास बनेका छन् ।

त्यसैगरी सानीभेरी गाउँपालिकामा पाँच हजार ५२७ वटा त्रिवेणी गाउँपालिकामा दुई हजार ९६० वटा र बाँफिकोट गाउँपालिकामा दुई हजार २२९ वटा अस्थायी आवास बनेका छन् । 

जिल्ला विपद् व्यवस्थापन कोषबाट स्थानीय विपद् व्यवस्थापन कोषमा रकम निकाशा भएको मध्य दुई हजार ४८७ जना लाभग्राहीले भने पहिलो किस्ताको रकम पाउन सकिरहेका छैनन् । पहिलो किस्ता पाएकाहरुलाई दोश्रो किस्ता वितरणको लागि स्थानीय तहहरुले जिल्ला विपद् कोषमा हालसम्म रकम माग नगरेको प्रशासन कार्यालयले जनाएको छ ।