स्वास्थ्यकर्मीहरुलाई गुमाई तथा शोक व्यवस्थापन तालिम 

रुकुम पश्चिमको सानीभेरी गाउँपालिकाका स्वास्थ्यकर्मीहरुको लागि गुमाई तथा शोक व्यवस्थापन सम्बन्धी तालिम दिईएको छ । 

सि.बि.एम ग्लोबलको आर्थिक सहयोग, सानीभेरी गाउँपालिका स्वास्थ्य तथा सामाजिक विकास शाखाको आयोजना र मानसिक स्वास्थ्य तथा परामर्श केन्द्र सी.एम.सी नेपाल अन्र्तगत जाजरकोट भुकम्प प्रतिकार्य परियोजनाले स्वास्थ्यकर्मीहरुलाई दुई दिने तालिम दिएको हो । 

सी.एम.सी नेपालका मनोसामाजिक मनोपरामर्शकर्ता डिलबहादुर शाहीका अनुसार मनका शोक सम्बन्धी रहेका अनुभवहरुलाई आदानप्रदान गरी व्यवस्थापन गर्न सहज भएको महशुस गराउने र शोक महशुस गरीरहेका व्यक्तीहरुलाई मानसिक स्वास्थ्य तथा मनोसामाजिक सहयोग दिने तरिकाका बारेमा जानकारी दिने उद्धेश्यका साथ तालिम सञ्चालन गरिएको हो ।  

बिहिबार सुरु भएर शुक्रबार समापन भएको उक्त तालिममा नौ जना पुरुष र १२ जना महिला गरेर २१ जना स्वास्थ्यकर्मीहरुको सहभागिता रहेको थियो । 
तालिममा गुमाई तथा शोकको अर्थ र अवधारणा, शोकको गम्भीरता र जटिलतालाइ प्रभाव पार्ने तत्वहरु, शोकको चरणहरु वा तह, शोकको कारण पर्ने प्रभाव र प्रतिकृयाहरु, व्यस्थापनका उपायहरु, शोकका बारेका भ्रमहरु, शोकको सामना तथा स्विकार गर्ने तरीकाहरु, स्व हेरचाह लगायतका बिषयमा सहजिकरण गरिएको थियो । 

तालिमको सहजिकरण सी.एम.सी नेपालका मनोसामाजिक मनोपरामर्शकताद्वय गगन बहादुर ओली र कमला पौडेलले गर्नुभएको थियो ।