सोसल मिडिया
स्वदेशमा रोजगारी नपाई बैदेशिक रोगजारीममा जान बाध्य हामी परदेशीहरुले थप रोजगार सिर्जना गरिरहेको अवस्थालाई कमै महत्व दिएको पाईन्छ ।
ठन्डा दिमागले सोच्ने हो भने खाडिसहितका अन्य मुलुकमा पुगेका परदेशीहरु लाखौ नेपालीका रोजगारदाता हुन् । यीनै रोजगारदाताहरुको कारण लाखौ नेपालीको घरमा चुल्हो बलिरहेको छ ।
रोजगारको खोजीमा खाडि लगायतका देश जाँदा पासपोर्ट बनाउने जनशक्ति चाहिन्छ । जुन कार्यालयमा कर्मचारीहरुले जागिर पाएका मात्रै छैनन् कार्यालय बाहिरका फोटोकपि गर्ने, टाइपिङ गर्ने, फोटो खिच्नेहरुले पनि राम्रै रोजगारी पाएका छन् । हामी खाडी जाँदा श्रम कार्यालयका कर्मचारीहरु, बाहिर बस्ने एजेन्टहरु र बीमा कम्पनीहरुले पाएको रोजगारी बिर्सन हुँदैन ।
दर्जनौ मेनपावर कम्पनी र तिनका कर्मचारीहरुले पाएको रोजगारी पनि हामी परदेश आउने जाने प्रयोजनबाटै सिर्जित छ । अनि मेडिकल एजेन्सीहरुले पिसिआर, एक्सरे गर्दै व्यवसाय चलाएका छन् । हामी घरबाट राजधानीसम्म आउन पर्छ । यस बिचमा यातायात व्यवसायी, होटेल व्यवसायीहरुले पाएको रोजगारीमा पनि खाडिका मजदुरको लगानी र हात रहेको पाईन्छ ।
एयरपोर्टका कर्मचारीहरु, सुरक्षाकर्मीहरु, ट्राभल एजेन्सीहरु, पाईलट, एयरहोस्टेजहरुको रोजगारी खाडि मुलुकमा जाने आउनेहरुको कामबाटै सिर्जित रहेको छ ।
नेपालीहरु बिदेश जानले नेपालमा रहेका बैंकहरुले काम पाएका छन् भने देशले विदेशी मुद्रा भण्डार गर्न पाएको छ । हामी परदेशीहरुको कारण घर नजिकको पसल चलेको छ, हाम्रा छोराछोरी पढ्ने स्कुलको शिक्षकहरु र स्कूल कर्मचारीहरुले रोजगारी पाएका छन् ।
हाम्रै कमाईले नेपालको भाटभटेनी देखि सीजी जस्ता सुपरमार्केटहरुको ब्यापार मज्जाले चलेको छ । हाम्रा भाई बहिनीहरुले चलाउने मोटरसाइकल र स्कुटर चढ्ने रहर खाडि लगायतका मुलुक आएरै पुरा भएको छ । यसबाट मोटरसाईकलका शोरुम र पेट्रोलपम्पले मूनाफा पाईरहेका छन् । उनीहरुको व्यापार खुब चलेको छ ।
हामी खाडी आउनाले मेरो परिवारले दशैं तिहारमा नयाँ लुगा लगाउन सक्ने भएका छन् । कपडा व्यापारीहरुले राम्रो आम्दानी गरेका छन् ।
हामी खाडी आएपछि हाम्रा घरमा स्क्रिनटच मोबाइल पनि भित्रिएको छ । घरमा वाइफाई जोडिएको छ । टेलिकम अन्तर्गतका कम्पनीहरुले मनग्य आम्दानी गरेका छन् । यी सबैकुरा हामीले बिदेशमा बगाएको पसिना र रगतको कमाईसँग जोडिएका छन् ।
यी बाहेक अरु धेरै नेपालीहरुलाई रोजगारी दिने हामी परदेशी नेपालीहरु आफैमा ठुलो रोजगारदाता हौं । यस अर्थमा लाखौ नेपालीको चुलो बाल्न हामी परदेशीहरुको योगदान आफैमा महान् छ ।
युवाहरुलाई रोजगार सुनिश्चितता गर्न नसकेपनि हाम्रो रेमिटेन्सलाई राज्यले उत्पादनमुलक कार्यमा लगाउन सकेका मात्रै पनि परदेशीको पसिनाको सम्मान हुन्छ ।
