सोसल मिडिया
रुकुम पश्चिममा भूकम्पपीडितहरुको अस्थायी आवास (टहरा) निर्माणको लागि हालसम्म ५९ करोड दुई लाख रुपियाँ निकाशा भएको छ । जिल्ला प्रशासन कार्यालयका अनुसार जिल्ला विपद् कोषबाट जिल्लाका छ वटा स्थानीय तहमा रहेका स्थानीय विपद् कोषमा उक्त रकम पठाईएको हो ।
निमित्त प्रमुख जिल्ला अधिकारी प्रवेश बढुवालले दिनुभएको जानकारी अनुसार २३ हजार ६०८ जना लाभग्राहीको लागि पहिलो किस्ता वापतको रकम पठाईएको हो । पठाईएको उक्त रकमबाट स्थानीय तहले २१ हजार १२५ जना लाभग्राहीको खातामा रुपियाँ जम्मा गरिसकेका छन् ।
निमित्त प्रमुख जिल्ला अधिकारी बढुवालले चौरजहारी नगरपालिकामा छ हजार २७९ जना लाभग्राहीको लागि १५ करोड ६९ लाख ७५ हजार रुपियाँ पठाईएकोमा छ हजार १६५ जना लाभग्राहीको खातामा २५ हजार रुपियाँका दरले रकम जम्मा भईसकेको बताउनुभयो ।
त्यसैगरी आठबीसकोट नगरपालिकामा सात हजार लाभग्राहीको लागि पठाईएको १७ करोड ५० लाख रुपियाँ सात हजार जनाकै खातामा जम्मा भईसकेको छ । मुसीकोट नगरपालिकामा एक हजार ३०५ जना लाभग्राहीको लागि पठाईएको तीन करोड २६ लाख २५ हजार रुपियाँ मध्य ६३४ जनाको खातामा मात्र पहिलो किस्ताको रकम जम्मा भएको छ ।
प्रशासन कार्यालयका अनुसार सानीभेरी गाउँपालिकामा चार हजार ५७३ जना लाभग्राहीको लागि ११ करोड ४३ लाख २५ हजार रुपियाँ पठाईएको छ । उक्त सबै रकम पालिकाले लाभग्राहीको खातामा जम्मा गरिसकेको छ । त्रिवेणी गाउँपालिकामा पनि दुई हजार ७५२ जना जना लाभग्राहीको लागि पठाईएको छ करोड ८८ लाख रुपियाँ सबै लाभग्राहिको खातामा पठाईसकिएको छ ।
बाँफिकोट गाउँपालिकामा एक हजार ६९९ जना लाभग्राहीको लागि पठाईएको चार करोड २४ लाख ७५ हजार रुपियाँ कुनै पनि लाभग्राहीको खातामा पठाईएको छैन । गाउँपालिकाका प्रमुख प्रशासकिय अधिकृत सरुवा भएर अन्यत्रै गएको र नयाँ नआएकोले उक्त रकम लाभग्राहीले पाउन नसकेका हुन् ।
सरकारले उपलब्ध गराएको अनुदान रकमबाट जिल्लामा हालसम्म दश हजार ४२३ वटा अस्थायी आवास निर्माण भएका छन् । जिल्ला प्रशासन कार्यालयका अनुसार सात हजार ११७ वटा आवास निर्माण भईरहेका छन् ।
रुकुम पश्चिममा सरकारी अनुदानबाट दश हजार बढी अस्थायी आवास निर्माण
