त्रिबेणीको बालचेतना प्राविका भवनहरु जिर्ण, पठनपाठनमा समस्या

रुकुम पश्चिम / रुकुम पश्चिमको त्रिबेणी गाउँपालिका वडा नम्वर ४ स्थित बालचेतना प्राथामिक विद्यालयका भवनहरु जिर्ण बनेका छन ।

विद्यालय भवन जिर्ण हुदाँ पठनपाठनमा समस्या भएको विद्यालयले जनाएको छ । चार वटा विद्यालय भवन रहेकोमा हाल तीन वटा भवन प्रयोगमा छन ति भवन पनि जिर्ण अवस्थामा रहेको विद्यालयका प्राधानाध्यापक टेकराज खड्काले जानकारी दिनुभयो । विद्यालयको एउटा भवन २०७७ सालमा भत्किएको हो । उक्त भवनमा प्रयोग गर्न नमिल्ने अवस्थामा रहेको छ ।

भवन माथिबाट पहिरो आए पछि एउटा भवन भत्किएको छ भने अर्को भवन पनि जिर्ण बन्दै गएको छ । ति विद्यालय भवन माथि सहिद स्मृती पार्कको लागि फिल्ड निर्माण गर्दा फालेको माटो विद्यालय भवनमा पस्दा एउटा भवन भत्किएको हो । २०७७ सालमा भवनमा माथि खनिएको फिल्डबाट विद्यालयमा पहिरो खसेको थियो ।

पहिरो खसे पछि पुर्व तिरको भवन भत्किए पनि अहिले सम्म नत पहिरो हटाईएको छ नत नयाँ भवन नै निर्माण गरिएको छ । भत्किएको भवन आर्थिक वर्ष २०६४÷६५ मा जिल्ला शिक्षा कार्यालयले जनश्रमदान सहित ६ लाख ५५ हजारमा निर्माण गरेको थियो । भत्किएको भवनसंगै रहेको अर्को भवनमा पनि हिउदमा मात्रै वस्न मिल्ने विद्यालयका प्रधानाध्यापक खड्काले बताउनुभयो ।

उहाँका अनुसार वर्षाको समयमा माथिबाट निरन्तर पहिरो झर्ने गर्दछ । पालिकामा नयाँ भवन निर्माण र पहिरो रोक्न तारजालीको माग गर्दा पनि गाउँपालिकाले कुनै चासो देखाएको छैन । तल्लो भागमा रहेका दुई वटा भवन पनि जिर्ण बन्दै गएका छन् । बालविकास देखि कक्षा ५ सम्म संचालनमा रहेको विद्यालयमा हाल ९० जना विद्यार्थीहरु अध्ययनरत छन ।