मूलपाटीको वार्षिकोत्सवको अवसरमा अपाङ्गता भएका विपन्न परिवारलाई सहयोग 

रुकुम पश्चिमको चौजहारी नगरपालिका –२ निवासी ५४ वर्षीया चन्द्रा परियारलाई सहयोग प्रदान गरिएको छ । 

मूलपाटी डटकमको पाँचौ वार्षिकोत्सवको अवसरमा आईतवार उहाँलाई खाद्यन्न, भाँडाकुडा र कपडा हस्तान्तरण गरिएको हो । 

चन्द्रा परियार न्युन दृष्टि भएको अपाङगता भएका व्यक्ति हुनुहुन्छ । उहाँको न त घर छ, न त जमिन छ । जाजरकोटको नलगाडका एक व्यक्तिसँग विवाह गरेको तर उहाँले छोडेर गएपछि उहाँ वर्षौ देखि विचल्लीमा पर्नुभएको छ । उहाँ हाल चौरजहारी नगरपालिका २ विजयश्वरी डाँडामा रहेको अर्के व्यक्तिको जीर्ण अवस्थाको घरमा बस्दै आउँनु भएको छ । 

साँझ बिहानको छाक टार्नको लागि समेत मागेर गुजारा चलाउँदै आएनु भएकी परियारलाई मूलपाटी डटकमको वार्षिकोत्सवको अवसरमा सामाजिक उत्तरदायित्व वहन गर्दै आवश्कतामुखी सहायता प्रदान गरिएको अनलाईनका सम्पादक केशव बिसीले बताउनुभयो । चाडपर्वको बेला के खाने र के लाउने भनेर चिन्तामा परेको व्यक्तिलाई वार्षिकोत्सवको सन्दर्भमा खाद्यन्न, भाँडाकुडा र कपडा उपलब्ध गराईएको बिसीले जनाउनुभयो । 

मूलपाटी डटकमको सञ्चालक संस्था मूलबाटो मिडिया प्रा.लि.का अध्यक्ष सुन्दर शर्माले विपन्न अवस्थाका रहनुभएकी परियारलाई चाडपर्वको बेला सहज बनाउन सानो सहयोग गरिएको जानकारी दिनुभयो ।

उहाँले परियार बस्ने गरेको घरमै पुगेर सामान उपलब्ध गराएको बताउनुभयो । केहि महिनाको लागि पुग्ने गरी चामल, पिठो, नुन, तेल, मसला, साबुन, दाल लगायत दैनिक भान्सामा प्रयोग हुने खाद्य सामाग्रीहरु, एक सेट भाँडाकुडा र एक सरो कपडा उपलब्ध गराएको अध्यक्ष शर्माले जानकारी दिनुभयो ।

सहयोग बुझेपछि परियारले खुसी व्यक्त गर्नुहुँदै मूलपाटी प्रति धन्यवाद व्यक्त गर्नुभयो । उहाँले असाहय र विपन्नको अवस्था बुझेर, खानेकुरा केहि पनि नभएको बेला मूलपाटीको टोलीले ठुलो सहयोग गरेको बताउनुभयो । दसै तिहार नजिकै आएको बेला, चुल्हो बाल्ने केहि पनि सामान नभएको बेलामा आएको खाद्यन्न, भाँडाकुडा र कपडा पाउँदा निकै हर्षित भएको उहाँको भनाई छ ।