रुकुमकोटमा यात्रु सहायता कक्ष स्थापना

रुकुम पूर्वको रुकुमकोटमा यात्रु सहायता कक्ष स्थापना गरिएको छ ।

बडादसैँ, शुभ दीपावली तथा छठ पर्वको अवसरमा यात्रुहरूको पीरमर्का सम्बोधन र आवागमनलाई सहज, सरल र सुरक्षित बनाउने उद्देश्यले जिल्ला प्रहरी कार्यालय र जिल्ला ट्राफिक प्रहरी कार्यालयको संयुक्त आयोजनामा यात्रु सहायता कक्ष स्थापना गरिएको हो ।

शुक्रबार एक कार्यक्रमका बिच प्रमुख जिल्ला अधिकारी कोपिला राईको प्रमुख आतिथ्यता र प्रहरी नायब उपरीक्षक खुमानन्द पाण्डेको अध्यक्षतामा भएको कार्यक्रमका बिच सहायता कक्ष स्थापना गरिएको हो । जिल्ला प्रहरी कार्यालयका अनुसार चाडपर्वका समयमा यात्रुहरूले भोग्नुपर्ने विभिन्न समस्या तथा पीरमर्काको सम्बोधन गर्नुका साथै सुरक्षित र सहज यात्राका लागि आवश्यक सहयोग उपलब्ध गराउने उद्देश्यले सहायता कक्ष स्थापना गरिएको हो ।

कार्यक्रममा जिल्लास्थित सम्पूर्ण सुरक्षा निकायका प्रमुखहरू, जनप्रतिनिधि, यातायात व्यवसायी, पत्रकार तथा स्थानीयवासीहरूको सहभागिता रहेको थियो । “सुरक्षित यात्रा, हाम्रो प्रतिबद्धता” भन्ने नारासहित यात्रुहरूको सुरक्षित आवागमन सुनिश्चित गर्न सहायता कक्ष सञ्चालनमा ल्याइएको बताईएको छ।