यस्तो छ सानीभेरी १० मा वर्षाले गरेको क्षतिको विवरण

रुकुम पश्चिमको सानीभेरी गाउँपालिकामा गत सोमबार बेलुका परेको अविरल वर्षाका कारण विभिन्न क्षेत्रमा ठुलो  भौतिक क्षति भएको छ । वडा नम्वर १० को विभिन्न स्थानमा भएको क्षतिको विवरण गाउँपालिकाले संकलन गरेको छ । 

मंगलबार दिनभर गाउँपालिका अध्यक्ष बिर्खबहादुर बिष्टसहितको टोलीले गाउँपालिकाको विभिन्न स्थानमा पुगेर पीडितहरुलाई भेटेर क्षतिको विवरण संकलन गरेको हो ।  

गाँउपालिकाले सार्वजनिक गरेको विवरणअनुसार बाढि तथा वर्षाको कारण ३ वटा घर पूर्ण रुपमा बगेका छन् भने २५ वटा घरमा आंशिक क्षति पुगेको छ । त्यस्तै २ वटा पसल पूर्ण रुपमा बगेका छन् भने ५ वटा पसलमा आंशिक क्षति भएको छ ।

गाउँपालिका अध्यक्ष बिर्खबहादुर विष्टका अनुसार वर्षाका कारण पशुचौपायातर्फ पनि ठुलो क्षति पुगेको छ । बाढीले ४ वटा भैसी, १० वटा बाख्रा, २ वटा भेडा, २ वटा गोरु र १२ वटा कुखुरा बगाएको छ । यसका साथै ३६० मुरी बराबरको धानबाली, २ तोला सुन र नगद ५० हजार रुपियाँ पनि बाढिले बगाएको अध्यक्ष बिष्टले जानकारी दिनुभयो ।

बाढीले स्थानीयका १० वटा घट्ट, ९ वटा शौचालय, १३ वटा खानेपानी योजना र ८ वटा सिँचाइ कुलोमा क्षति पुगेको छ भने २ वटा भवनमा आंशिक क्षति भएको छ । 

गाउँपालिकाका अनुसार वडा नम्वर. ८, ९ र ११ को थप क्षतिको विवरण आउन बाँकी रहेको छ । प्रभावित क्षेत्रका सडक सरसफाई तथा मर्मत गरेर आवतजावत सहज बनाउन आवश्यक प्रक्रिया अघि बढाइएको जनाएको छ ।