नेभिगेशन
समाज

चौरजहारीमा शंखपिपल मेला भव्य रूपमा सम्पन्न

रुकुम पश्चिमको चौरजहारी नगरपालिका–२ स्थित परम्परागत रूपमा लाग्दै आएको शंखपिपल मेला भव्य रूपमा सम्पन्न भएको छ।

हरेक वर्ष तिहारपछिको हरिबोधनी एकादशी तथा द्वादशीको अवसरमा लाग्ने यस मेलामा रुकुम पश्चिमसहित सल्यान र जाजरकोटका स्थानीयवासीहरूको सहभागिता रहने गर्दछ ।

यस वर्षको मेलामा मयूर नाच, सिँगारु नाच तथा दमाह नाचलगायतका परम्परागत सांस्कृतिक प्रस्तुतिहरूले मेलाको रौनक थपेका थिए। स्थानीय कला, संस्कृति र मौलिक परम्पराको झल्को दिने यी प्रस्तुतिहरूले मेलामा सहभागी दर्शकहरूको ध्यान आकर्षित गरेका थिए।

सल्यान, जाजरकोट र रुकुम पश्चिमको संगमस्थलका रूपमा रहेको शंखपिपलमा लाग्ने यस मेलाले तीन जिल्लाबीचको सामाजिक, सांस्कृतिक तथा आपसी सम्बन्धलाई जोड्दै आएको छ। धार्मिक तथा सांस्कृतिक महत्त्व बोकेको यस मेलाले स्थानीय कला, संस्कृति र परम्पराको संरक्षण तथा प्रवर्द्धनमा समेत योगदान पुर्‍याउँदै आएको छ।

वर्षौंदेखि निरन्तर लाग्दै आएको शंखपिपल मेला स्थानीयको भेटघाट, आपसी सद्भाव र सांस्कृतिक पहिचानको साझा उत्सवका रूपमा स्थापित हुँदै  आयकाे  छ।

प्रकाशित मिति:
प्रतिक्रिया दिनुहोस्