आठबिसकोटमा गाडी दुर्घटना हुँदा सात जना घाईते

रुकुम पश्चिमको आठबिसकोटमा यात्रुवहाक फोर्स गाडी दुर्घटना हुँदा सात जना घाईते भएका छन् । 

सोमबार दिउँसो आठबिसकोट नगरपालिकाको राडी बजारबाट जिल्ला सदरमुकाम मुसिकोट खलंगातर्फ आउँदै गरेको लु.प्र. ०३–००१ ख ००११ नम्वरको फोर्स गाडी आठबिसकोट १० भयाउनेस्थित भित्रि सडकमा दुर्घटना भएको प्रहरीले जनाएको छ । जिल्ला प्रहरी कार्यालयका सूचना अधिकारी प्रहरी निरीक्षक झविन्द्र परियारका अनुसार दुर्घटनामा परेर सात जना घाईते भएका छन् । 

घाईते हुनेहरुमा आठबिसकोट नगरपालिका १० निवासी १६ वर्षीय नविन केसी, सोही वडाका ६८ वर्षीय दले दमाई, ६८ वर्षीय बिरजंग दमाई, ७४ वर्षीय दले दमाई, आठबिसकोट नगरपालिका २ निवासी ५८ वर्षीय रबिन्द्र बिश्वकर्मा, वडा नम्वर १ रोकाजाखेत निवासी ४३ वर्षीय मनिराम बिक र बाँफिकोट गाउँपालिका ६ बस्ने ६५ वर्षीय कमला मल्ल रहनु भएको छ । 

दुर्घटनाको सूचना लगत्तै इलाका प्रहरी कार्यालय आठबिसकोटबाट प्रहरी निरीक्षक बिजय चापागाँईको नेतृत्वमा गएको प्रहरी टोलीले घाईतेहरुलाई उद्धार गरी उपचारको लागि आठबिसकोट नगर अस्पतालमा ल्याईएको छ ।

घाइते मध्य नविन केसीको अवस्था मध्यम रहेको छ भने अन्य सबैको अवस्था सामान्य रहेको छ । गाडीको ब्रेक फेल भएर सडकमा पल्टिएर दुर्घटना भएको प्रहरीको भनाइ छ ।

गाडी चालक सानीभेरी गाउँपालिका ६ निवासी २८ वर्षीय रामबहादुर बिकलाई प्रहरीले नियनत्रणमा लिएको छ भने दुर्घटनाको थप अनुसन्धान भईरहेको जनाएको छ ।