'मिलनसार' मिलन : विद्यार्थी राजनीतिबाट खारिएर मन्त्रीसम्म

रुकुम पश्चिमको सानीभेरी गाउँपालिका ९ राङजा गाउँमा २०३२ साल फागुन ८ गते जन्मिनु भएकी मिलन खड्का रोका राजनीतिबाट विद्यार्थी संगठनबाटै होमिनु भएको हो । 

बुवा दिर्घु खड्का र आमा बर्नी खड्काको कोखबाट जन्मिनु भएकी खड्काहाल मुसिकोट नगरपालिका १३ लामाडाँडा निवासी हुनुहुन्छ । २०४५ सालमा १४ वर्षको उमेर देखि नै राजनीतिको कखरा शुरु गुर्नभएकी उहाँ लगनशील, इमान्दार र कर्तव्यनिष्ठ महिला नेतृको रुपमा चिनिनुहुन्छ । कक्षा ६ मा पढ्दा राप्ती ज्ञानोदय मावि सिम्लीमा विद्यार्थी संगठनको इकाई सदस्यबाट राजनीति शुरुवात गर्नुभएकी उहाँले २०५३ सालमा तत्कालिन नेकपा माओवादीको पार्टी सदस्यता लिएर पार्टी राजनीतिमा प्रवेश गर्नु भएको थियो । 

२०५४ मा उहाँले अखिल नेपाल महिला संघ क्रान्तिकारीको एरिया कमिटी (सिम्ली, गरायला, अर्मा, पुर्तिमकाँडा र घेत्मा गाविस) को अध्यक्ष भएर जिम्मेवारी बहन गर्नुभएको थियो भने २०५३ बैशाखदेखि २०५५ को भदौसम्म जनसहयोग प्रावि माथिल्लो अमडाँडामा शिक्षण समेत गर्नुभएको थियो । 

विद्यालयमा अध्यापनरत रहँदा उहाँलाई प्रहरीले पक्राउ गर्न खोजेपछि ७ महिनाको गर्भसहित विद्यालय छाडेर २०५५ भाद्र ४ गतेदेखि पार्टीको पूर्णकालिन कार्यकर्ता बनेर जनयुद्धमा सामेल हुनुभएको थियो । पूर्णकालिन भएको २ महिनापछि सिम्लीको फुक्रुटाकुरामा २०५५ कार्तिक २ गते प्रहरीले उहाँका श्रीमान् टिकाराम ओलीलाई गिरफ्तारपछि हत्या गरेको थियो । सिम्लीको फुक्रुटाकुरामा उहाँका श्रीमान टिकाराम ओली सहित केही व्यक्तिको सामुहिक हत्या भएको थियो । 

त्यसपछि उहाँले २०५५ देखि २०५७ सम्म पार्टीको पुर्तिमकाँडा र अर्मा गाविस इन्चार्जको जिम्मेवारी सम्हाल्नुभयो । २०५६ देखि २०५८ सम्म अखिल नेपाल महिला संघ क्रान्तिकारीको जिल्ला सदस्य, कोषाध्यक्ष, सचिव हुँदै उपाध्यक्षसम्मको जिम्मेवारी उहाँले कुशलतापूर्वक निर्वाह गर्नुभएको छ । 

२०५८ देखि २०६१ सम्म अखिल नेपाल महिला संघ क्रान्तिकारीको जिल्ला अध्यक्षको महत्वपूर्ण जिम्मेवारी सम्हाल्नु भएकी खड्काको ढाडमा टेकेर टाउकोमा हिर्काउने पार्टीको सैन्य अभियान अन्तरगत २०६१ मंसिरमा गण्डक क्षेत्रको पाल्पा जिल्लामा सरुवा भएको थियो ।२०६३ चैत्रसम्म पाल्पामा रहँदा पार्टीको जिल्ला सचिवालय सदस्य र एरिया इन्चार्जको जिम्मेवारीमा रहेर समेत काम गर्नुभयो । 

पाल्पामै कार्यरत रहँदा २०६३ अखिल नेपाल किसान महासंघको केन्द्रीय सदस्य भई सल्यान र रुकुम जिल्ला इन्चार्जको जिम्मेवारी समेत निर्वाह गर्नुभयो भने २०६४ असोजमा नेकपा (माओवादी) को मगरात राज्य समिति सदस्यको जिम्मेवारीमा क्रियाशिल रहनु भयो । २०६८ मा अखिल नेपाल महिला संघ क्रान्तिकारीको केन्द्रीय सदस्यको जिम्मेवारीमा रही २०७६ सम्म रुकुम जिल्ला इन्चार्जको समेत कार्यभार सम्हाल्नु भयो ।

२०७८ मंसिरमा नेकपा (माओवादी केन्द्र) केन्द्रको कर्णाली प्रदेश सदस्य हुनुभएकी उहाँ राजनैतिक जीवन शुरु गरेको ३४ वर्षपछि २०७९ मंसिरदेखि रुकुम पश्चिमबाट कर्णाली प्रदेश सभा सदस्यको जिम्मेवारीमा हुनुहुन्छ । यसका साथै २०८२ कात्तिकदेखि हालसम्म नेपाली कम्युनिष्ट पार्टीको केन्द्रीय सदस्य समेत हुनुहुन्छ । 

आज २०८३ भदौ ११ कर्णाली प्रदेश सरकारको भौतिक पूर्वाधार तथा सहरी विकास मन्त्रीमा नियुक्त हुनुभएकी मिलन खड्का मिलनसार, योजनामुताविक कार्य सम्पन्न गर्ने स्वभावकी हुनुहुन्छ । सरल व्यवहार, सबैसँग सुमधुर सम्बन्ध स्थापित गर्ने बानी र काममा कटिबद्ध उहाँले कर्णालीको आवश्यकतामा आधारित दिगो विकासलाई प्राथमिकता दिने बताउनुभएको छ ।