कर्णालीका मुख्यमन्त्रीले पाए विश्वासको मत

कर्णाली प्रदेश सरकारका मुख्यमन्त्री नेपाली कम्युनिस्ट पार्टी (नेकपा) का मंगलबहादुर शाहीले विश्वासको मत प्राप्त गर्नुभएकाे छ ।

१२ साउनमा नेकपा एमालेको समर्थनमा मुख्यमन्त्री नियुक्त भएका शाहीले बुधबार दिउँसो ३ बजेका लागि आह्वान गरिएको प्रदेशसभा बैठकबाट विश्वासको मत पाउनभएकाे हाे ।

बैठकमा ४० मध्ये सभामुखबाहेक ३६ सांसदले मतदान गरेका थिए । जसमा शाहीको पक्षमा २१ र विपक्षमा १३ जना सांसदले मतदान गरेका छन् । दुई जना तटस्थ बसे भने तीन जना बैठकमा उपस्थित भएनन् ।

शाहीलाई आफ्नै दल नेकपाका १४ मध्ये १३ र एमालेका १० मध्ये आठ गरी २१ सांसदले मतदान गरेका हुन् । ४० सदस्यीय प्रदेशसभामा सरकार बनाउन २१ सांसद आवश्यक पर्छ । तटस्थ बस्नेमा नेकपाले आफ्ना सांसद मानेका पूर्वमुख्यमन्त्री राजकुमार शर्मा र राप्रपाकी सन्तोषी शाही छन् ।

नेपाली कांग्रेस र नेकपाबीच दुई वर्षयताको गठबन्धन भत्किएपछि नेकपा र एमाले गठबन्धनमा जोडिएका थिए । कांग्रेससँग पूर्ववत् आलोपालोको सहमति एमालेले पालना नगरेको भन्दै ३१ असारमा कांग्रेसका चार मन्त्रीले राजीनामा दिएपछि प्रदेश सरकार फेरबदलको कसरत चलेको थियो ।

कांग्रेसका मन्त्रीले राजीनामा दिएको भोलिपल्ट (३२ असार) मा नेकपा र कांग्रेस मिलेर तत्कालीन मुख्यमन्त्री यामलाल कँडेलविरुद्ध अविश्वास प्रस्ताव दर्ता भएको थियो ।