संसद्‍मा गोपाल शर्माको प्रश्न : हाम्रो प्रधानमन्त्री कहाँ हुनुहुन्छ ?

सुनसरीको घटनाबारे संसद्लाई जानकारी दिनुपर्नेमा प्रधानमन्त्री वालेन्द्र शाह सदनमा नआएको भन्दै नेपाली कम्युनिस्ट पार्टीले आपत्ति जनाएको छ । नेकपाका सांसद गोपाल शर्माले प्रधानमन्त्री शाह संसद्‍मा आएर सुनसरी घटनाको विषय र समग्र अवस्थाबारे जानकारी दिनुपर्ने बताउनु भएको छ।
 
प्रतिनिधिसभाको बिहीबारको बैठकमा सांसद शर्माले प्रधानमन्त्रीले मुलुकको अभिभावकत्व लिनुपर्ने बताउनुभयो। उहाँको प्रश्न सोध्नुभयो, 'सुनसरी घटनाले सिंगो देशलाई तरंगित बनाएको छ । यस संवेदनशील अवस्थामा पनि प्रधानमन्त्रीले संसद्‍मा आएर त्यहाँको विषयवस्तु, घटना र समग्र अवस्थाबारे जानकारी दिनुपर्थ्यो तर विडम्बना हाम्रो प्रधानमन्त्री कहाँ हुनुहुन्छ ?’

प्रधानमन्त्री यस्तो अवस्थामा के गरिरहेका छन् भन्नेबारे सदनलाई जानकारी नरहेको सांसद शर्माको भनाइ थियो । ‘प्रधानमन्त्री के गर्दै हुनुहुन्छ ? न संसद्लाई जानकारी छ, न कसैलाई जानकारी छ,’ उहाँले भन्नुभयो, ‘राज्य कहाँ छ ? सरकार अभिभावक बन्नुपर्छ कि पर्दैन ?’

प्रधानमन्त्री शाह र गृहमन्त्री सुधन गुरुङले विगतमा प्रहरीले बल प्रयोग गर्दा सरकारको नेतृत्व र गृह प्रशासनको नेतृत्वले जिम्मेवारी लिनुपर्ने तर्क राख्ने गरेको भन्दै सांसद शर्माले सुनसरीको कप्तानगन्जमा भएको ओमप्रकाश मेहताको हत्याको जिम्मेवारी स्थानीय प्रहरीले लिने कि गृहमन्त्रीले भन्ने प्रश्न उठेको बताउनुभयो ।

प्रधानमन्त्रीले संसद्‍मा आएर ती घटनाको बारेमा सत्यतथ्य जानकारी दिनुपर्ने माग सांसद शर्माले दोहोर्‍याउनुभयो ।