रुकुम पश्चिममा सगरमाथा वृक्षारोपण महाअभियान शुभारम्भ

रुकुम पश्चिममा एक महिने सगरमाथा वृक्षारोपण महाअभियान शुभारम्भ भएको छ । डिभिजन वन कार्यालयको आयोजनामा आईतबार सानीभेरी गाउँपालिका ७ फुक्रुस्थित नदी उकास क्षेत्रमा वृक्षारोपण गरेर महाअभियानको शुभारम्भ गरिएको हो । 

राष्ट्रिय वृक्षारोपण दिवको अवसर पारेर असार १४ गतेदेखि सुरु गरिएको अभियान साउन १५ गतेसम्म सञ्चालन हुने डिभिजन वन कार्यालयका डिभिजनल वन अधिकृत बसन्तबाबु श्रेष्ठले जानकारी दिनुभयो । 

प्रतिनिधि सभा सदस्य गोपाल शर्माको प्रमुख आतिथ्यतामा वृक्षारोपण कार्यक्रम सुरुवात गरिएको हो । आजै सिसौ र खयर प्रजातिका ५०० विरुवा रोपण गरिएको डिभिजनल वन अधिकृत श्रेष्ठले बताउनुभयो । 

वृक्षारोपण कार्यक्रममा जिल्ला समन्वय प्रमुख लुम्बिनी गौतम, जिल्ला समन्वय उपप्रमुख देब बहादुर बि.क., सानीभेरी गाउँपालिकाका अध्यक्ष बिर्ख बहादुर बिष्ट, प्रमुख जिल्ला अधिकारी निशानराज गौतम, जिल्ला न्यायधिवक्ता हरि प्रसाद घिमिरे, जिल्ला समन्वय अधिकारी मेघराज सोनी, प्रहरी नायब उपरीक्षक बेदबहादुर पौडेल, सशस्त्र प्रहरी नायब उपरीक्षक जगदिशचन्द्र हमाल, प्रमुख अनुसन्धान अधिकृत नेब बहादुर राणा लगायतको उपस्थिति रहेको थियो।

अभियान एक महिनासम्म निरन्तर चल्ने बताईएको छ ।