चौरजहारीले राजनैतिक र प्राविधिक कठिनाईका बिच पनि राम्रो काम गर्दै आएको छ : प्रतिनिधि सभा सदस्य शर्मा

प्रतिनिधि सभा सदस्य गोपाल शर्माले विभिन्न कठिनाई तथा अभावका बावजुद चौरजहारी नगरपालिकाले राम्रो काम गर्दै आईरहेको बताउनुभएको छ । 

बुधबार चौरजहारी नगरपालिकाको २३औ नगरसभालाई सम्बोधन गर्नुहँदै शर्माले परिवर्तित परिस्थितिले एउटै राजनीतिक दललाई बिखण्डन गरेपछि चौरजहारीले राजनीतिक जटिलताहरु र केहि प्राविधिक कठिनाई पनि भोगेर यहाँसम्म आईपुगेको बताउनुभयो । तर पनि चौरजहारीमा बढी र राम्रा काम भएकोले महत्वपूर्ण र राम्रा कामहरुलाई संस्थागत गर्नतर्फ लाग्नुपर्ने उहाँको सुझाव रहेको छ । 

स्थानीय तहको दोश्रो निर्वाचनबाट निर्वाचित जनप्रतिनिधिको कार्यकाल करिब अन्तिम रहेकोले नगर सभालाई थप ऐतिहाँसिक र महत्वपूर्ण सन्दर्भका रुपमा लिन  उहाँले अनुरोध गर्नुभयो । कार्यकाल समिक्षाको चरणमा आएको नीति, कार्यक्रम र बजेट महत्वपूर्ण हुने भएकोले जनतासँग गरेका प्रतिबद्धतालाई सम्झेर कार्य गर्नुपर्ने उहाँको भनाइ छ । 

उहाँले जिम्मेवारी सिमित भएको तर जनताका अपेक्षा असिमित भएको सन्दर्भलाई जोड दिनुहुँदै आवश्यकता र मागको प्राथमिकिकरण गर्न आवश्यक रहेको बताउनुभयो । चुनावमा प्रस्तुत हुँदा जनताले जे–जे माग्छन्, त्यसमा हस् भन्ने अवस्था रहेकोले ती मागहरुलाई समेत मध्यनजर गर्न चुक्न नहुने उहाँले उल्लेख गर्नुभयो । 

नगरवासी समेत रहनु भएका शर्माले प्रतिनिधि सभा सदस्यमा निर्वाचित भएपछि नगरपालिकाको कार्यक्रममा पहिलो पटक सहभागी हुनुभएका उहाँले तीन महिनाको बिचमा समग्र जिल्लाको लागि गर्नुपर्ने कामहरुको लागि प्रयत्न गरिहेको बताउनुभयो । 

उहाँले असार मसान्तसम्म मध्यपहाडी राजमार्ग अन्तर्गत भेरीनदिमा पुलको लागि टेण्डर खुल्ने तयारी रहेको जानकारी दिनुभयो । यो कार्य आफ्नो कार्यकालको मुख्य एजेण्डा रहेको उहाँको भनाइ छ । पाँच वर्षसम्म निरन्तर काम गर्ने ईच्छा रहेको बताउँनुहुँदै उहाँले सिंगो रुकुमको लागि के के गर्नुपर्छ भने क्रमिक काम गर्दै जाने उल्लेख गर्नुभयो ।  

चौरजहारी हुँदै मध्यपहाडि राजमार्ग गएको र नयाँ शहरको रुपमा विकसित भईरहेको हुनाले चौरजहारीमा बढी बजेट आउनु स्वभाविक रहेको उहाँको भनाइ छ । नयाँ शहर आयोजनालाई अवसरका रुपमा लिएर काम देखाउनतर्फ नगरपालिकाले सक्नुपर्ने उहाँको भनाइ छ । 

उहाँले मटेलामा पुलको योजना बनेको, चाईनाबगर देखि रिम्ना जोड्ने पुल निर्माणको प्रक्रिया थालेको, सल्लीबजार देखि चौरजहारी सडकखण्डमा विगतमा गरेको मेहेनतको प्रतिफल स्वरुप परिणाम देखिदै गएको समेत उहाँले जानकारी गराउनुभयो ।  

कार्यक्रममा प्रतिनिधि सभा सदस्य शर्माले चौरजहारी विमानस्थलमा आगामी साउन महिना देखि जहाज सञ्चालनको पहल गरेपछि नागरिक उड्ययन प्राधिकरणले तालिका नै सार्वजनिक गरेको बताउनुभयो ।

तर, चौरजहारीमा जहाजको सेडुअल सार्वजनिक भएपछि केहि चौरजहारीकै व्यक्तिले जहाज चल्दैन, किन सेडुअल राखेको ? भनेर चौरजहारीको विकास रोक्न खोजेको सूचना आफूलाई प्राप्त भएको बताउनुभयो । उहाँले यस खालको विकास रोक्न खोज्ने, खुट्टा तान्न खोज्ने प्रवृति र विकास बिरोधी गिरोहको गतिविधिले बडो नमिठो अनूभव भएको बताउनुभयो । 

सभामा उहाँले वडा वडामा विकास निर्माणका मागहरु बढी रहेको तर श्रोतको अभाव रहेकोले श्रोत बृद्धि गर्नेतर्फ सोच्नुपर्ने बताउनुभयो । उहाँले नगरपालिकाको विकासका लागि एकिकृत रुपमा अघि बढ्नुपर्ने, यो र त्यो भनेर व्यक्ति र पार्टी हेर्न नहुने उल्लेख गर्नुहुँदै आफू नगरपालिकासँग इमान्दार रुपमा सहकार्य गर्न तयार रहको बताउनुभयो ।