रुकुमको बिजयश्वरी बोर्डिङ स्कुललाई राष्ट्रियस्तरको सम्मान तथा अवार्ड प्रदान

रुकुम पश्चिमको अग्रणी शैक्षिक संस्था बिजयश्वरी सेकेण्डरी ईङ्गलिस मिडियम बोर्डिङ स्कुल राष्ट्रियस्तरको शिक्षा पुरस्कारबाट सम्मानित भएको छ । 

शिक्षालयले काठमाडौंमा आयोजना गरेको राष्ट्रिय शैक्षिक पुरस्कार वितरण समारोह, २०२६ मा मुसिकोट नगरपालिका १ खलंगास्थित बिजयश्वरी सेकेण्डरी बोर्डिङ स्कुललाई “गुडविल अचिभमेन्ट अवार्ड” प्रदान गरिएको हो । 

नेपाल तथा भारतका उच्च शैक्षिक प्रतिष्ठानका प्रतिनिधिको उपस्थितीमा पूर्व राजदूत तथा त्रिभुवन विश्वविद्यालयका पूर्व उपकुलपति केदारभक्त माथेमाले बिजयश्वरी सेकेण्डरी बोर्डिङ स्कुलका सञ्चालका अनिता कुमाई भण्डारीलाई उक्त सम्मान तथा अवार्ड प्रदान गर्नुभएको हो ।  

शिक्षा क्षेत्रमा विद्यालयले पुर्‍याएको योगदान, गुणस्तरीय शैक्षिक वातावरण निर्माण तथा विद्यार्थीको सर्वाङ्गीण विकासमा खेलेको भूमिकाको कदर गर्दै उक्त सम्मान प्रदान गरिएको हो ।

पुरस्कार प्राप्त गरेपछि स्कुलका प्रिन्सिपल जयबहादुर थापाले यस सम्मानले आगामी दिनमा अझ प्रभावकारी रूपमा शैक्षिक सेवा प्रदान गर्ने थप प्रेरणा मिलेको बताउनुभयो। राष्ट्रियस्तरको सम्मानले स्कुलको मात्र नभई रुकुम पश्चिमको शिक्षा क्षेत्रलाई थप गौरवान्वित बनाएको थापाले उल्लेख गर्नुभयो । 

कार्यक्रमा अन्य शैक्षिक संस्थाहरूलाई पनि विभिन्न अवार्ड प्रदान गरी सम्मान प्रदान गरिएको थियो। कार्यक्रममा सुर्खेत जिल्लाको वीरेन्द्रनगरस्थित सिद्धपाइला इङ्लिस मिडियम सेकेन्डरी स्कूलका प्रिन्सिपल नैन सिंह खत्रीलाई ‘एक्सीलेन्स प्रिन्सिपल अवार्ड अफ दि इयर’ प्रदान गरिएको छ भने सुर्खेतकै भेरीगङ्गाको देउती विद्या मन्दिर सेकेन्डरी स्कूलका प्रिन्सिपल नोख बहादुर खत्रीलाई ‘डाइनामिक प्रिन्सिपल अवार्ड’ तथा जाजरकोटको श्री एन. पी. फ्रेन्डसिप इङ्लिस स्कूलका प्रिन्सिपल नरबहादुर खड्कालाई ‘एक्सीलेन्स स्कूल अवार्ड’ प्रदान गरिएको छ। 

त्यसैगरी सर्लाहीको श्रीमती कृष्णदेवी जनता माध्यमिक विद्यालयका युगेश्वर राउतलाई ‘एजुकेशन एलिगेन्स अवार्ड’ र प्युठान नगरपालिका वडा नम्वर ८ को धर्मभक्त प्राविका प्रिन्सिपल बसन्त गिरीलाई ‘बेस्ट प्रिन्सिपल अवार्ड’ प्रदान गरिएको थियो ।