खारा जनयुद्ध सङ्ग्रहालय निर्माण कार्यमा ढिलाई

सशस्त्र द्वन्द्वको बेला राज्य र तत्कालिन बिद्रोही पक्षबाट पटक पटक आक्रमणमा परेर ठुलो क्षति बेहोरेको रुकुम पश्चिमको खारामा निर्माण थालिएको ‘खारा जनयुद्ध सङ्ग्रहालय’ लथालिङ्ग अवस्थामा पुगेकाे छ । 

त्रिवेणी गाउँपालिका वडा नम्वर ६ र ३ को सिमाना पर्ने झुल्नेटा धुममा निर्माणाधिन खारा जनयुद्ध सङ्ग्रहालयको काम सुस्त हुँदा लथालिङग अवस्थामा पुगेको हो । सशस्त्र द्वन्द्वका विभिन्न घटना र पक्षहरुलाई अभिलेखका रुपमा विकसित गरेर सङ्ग्राहलय बनाउने उद्धेश्यले राज्यले ठुलो लगानी गरेको बहु वर्षीय योजना तोकिएको समयमा नबन्दा लथालिङ्ग हुन पुगेको छ । 

करिब १३ करोडको लगानीमा निर्माण थालिएको यो सङ्ग्राहलय ठेकेदार कम्पनीको बेवास्ताको कारण अधुरै रहेको छ । डिभिजन वन कार्यालय रुकुम पश्चिमबाट कार्यान्वयन हुने यस योजनाको लागि जम्बुदिप जे.बि.जि.जे.भी. नेपालगञ्जले निर्माणको लागि ठेक्का सम्झौता गरेको थियो ।

२०८२ साल असार २९ गतेसम्म निर्माण सम्पन्न हुने गरी २०८० साउन १४ गते ठेकेदार कम्पनीसँग सम्झौता भएको डिभिजन वन कार्यालयका प्रमख बसन्तबाबु श्रेष्ठले जानकारी दिनुभयो । उहाँका अनुसार सम्झौता अनुसार काम नहुँदा २०८३ असार १५ गतेभित्र काम सक्ने गरी समयावधि थप भएको छ । तर ठेकेदार कम्पनीको सक्रिय उपस्थिति निर्माणस्थलमा देखिदैन । म्याद थप भएको मितिमा पनि काम पुरा नहुने अवस्था रहेको डिभिजन वन अधिकृत श्रेष्ठले मूलपाटीलाई बताउनुभयो । 

उहाँका अनुसार हालसम्म ६० प्रतिशत भौतिक र ४०.६७ प्रतिशन मात्र वीत्तिय प्रगती भएको छ । १२ करोड ९८ लाख ९६ हजार ७३ रुपियाँ ५६ पैसामा ठेक्का सम्झौता भएको यस योजनाको लागि हालसम्म पाँच करोड ५० लाख नौ हजार ७६० रुपियाँ ८६ पैसा रकम भुक्तानी भईसकेको छ । कार्यालयका अनुसार ठेकेदार कम्पनीले लिएको ५१ लाख रुपियाँको पेश्की फछ्र्यौट हुनै बाँकि रहेको छ । 

खारा जनयुद्ध सङ्ग्रहालय निर्माण योजनामा सङ्ग्रहालय भवन, चिल्ड्रेन पार्क, भ्यु टावर, पदमार्ग लगायतका काम समावेश रहेका छन् । तर यी सबै काम अधुरै रहेका छन् । मूलपाटीसँगकाे कुराकानीमा डिभिजनल अधिकृत श्रेष्ठले म्याद थप भएको समयमा काम सम्पन्न गर्न ठेकेदार कम्पनीलाई बारम्बार सम्पर्क गरिरहेको बताउनुभयो । 

जिल्लाको गौरवको योजना तोकिएको मितिमा पुरा नभएपछि जिल्ला समन्वय समितिका प्रमुख लुम्बिनी गौतमलगायतको टोलीले स्थलगत अनुगमन गरेको थियो । अनुगमनका क्रममा निर्माण थालिएका कुनै पनि काम पुरा नभएको, अधुरो र लथालिङ्ग अवस्थामा देखिएकोले काम सन्तोषजनक नभएको निश्कर्ष निकालिएको थियो । समन्वय समितिका प्रमुख गौतमले म्याद थप भएको मितिमा काम पुरा हुने सम्भावना नरहेको तर जति सकिन्छ काम तिब्र गतिमा गर्नुपर्यो भनेर ठेकेदार कम्पनीसँग समन्वय गरिएको बताउनुभयो ।

त्रिवेणी गाउँपालिकाका अध्यक्ष गणेश केसीले अनुगमनपश्चात ठेकेदार कम्पनीले केहि कामदारहरु निर्माणस्थलमा पठाएतापनि असारभित्र सकिन मुश्किल रहेको बताउनुभयो । जनयुद्ध सङ्ग्रहालय निर्माण भएमा स्थानीय पर्यटन प्रवद्र्धन हुनका साथै ऐतिहासिक सम्पदा तथा घटनाको संरक्षण हुने उहाँको भनाइ रहेको छ ।