जनयुद्धका जिउँदा सहिद शर्मालाई कांग्रेसको केन्द्रिय सदस्य बनाउन माग

रुकुम पश्चिमको चौरजहारी नगरपालिका -११ का गोपाल शर्मालाई नेपाली कांग्रेसको केन्द्रिय सदस्य बनाउन माग गरिएको छ । 

शर्मा जिउँदो सहिदको रुपमा चिनिनुहुन्छ । सशस्त्र द्वन्दको क्रममा तत्कालिन बिद्रोही माओवादीबाट नेपाली कांग्रेसमा आस्था राखेकै कारण २०५५ साउन ११ गते उहाँको दुवै आँखामा तेजाव हाल्नुका साथै खुकुरी प्रहार गरेर गम्भिर घाईते बनाईएको थियो । मर्यो भनेर छोडिएका शर्मा हाल पूर्ण रुपमा दृष्टिविहिन तथा सशक्त हुनुहुन्छ । 

नेपाली काँग्रेसका युवा नेता खड्क डाँगीले बल्लतल्ल बाँचेर पनि कांग्रेसकै हितमा जीवन व्यत्तित गरिरहनुभएका शर्मालाई नेपाली काँग्रेसले सम्मानसहित केन्द्रिय सदस्यमा मनोनित गर्न आवश्यक रहेको बताउनुभयो । उहाँका अनुसार कठिनपूर्ण अवस्थामा जीवन व्यतित गरिरहनुभएका शर्माले नेपाली कांग्रेसको झण्डा फहराउदै विशेष महाधिवेशनको पक्षमा समेत सशक्त आवाज प्रवाह गर्नुभएकाे थियाे। 

युवा नेता डाँगी लगायतका कांग्रेसजनहरुले तत्कालिन द्वन्द्वबाट पीडित हजारौ सहित परिवार तथा घाईतेहरुको न्यायको लागि शर्मा जस्ता जिउँदा सहिद तथा काँग्रेसका हस्तीहरुलाई उपर्युक्त स्थान दिन आवश्यक रहेको जनाएका छन् । उनीहरुले परिवर्तित राजनीतिको परिदृश्ष्यलाई आत्मसाथ गरेर शर्मालाई केन्द्रिय सदस्यमा मनोतित गर्न माग गरेका छन् । 

युवा नेता डाँगीले यस बिषयमा भावुक सन्देश समेत प्रकाशन गर्नुभएको छ । उहाँले रगतले भिजेको रुकुमेली माटोमा ८३ जना कांग्रेसजनले सशस्त्र द्वन्द्वको क्रममा जीवनको बलिदान दिएको स्मरण गर्नुहुँदै सहिद तथा घाईतेहरुको न्यायको लागि ज्युँदा सहिद शर्मा जस्ता हस्तीहरुलाई उचित स्थान दिनुपर्ने बताउनुभयो ।

उहाँले रुकुमको राजनीतिक भूगोल पृथक रहेको चर्चा गर्नुहुँदै नेपाली कांग्रेसले जनजाती, सहिद परिवार, दलित समुदायबाट जिल्ला पार्टीको नेतृत्वमा स्थापित गरेको समावेशी भूमी भएको समेत स्मरण गर्नुभएको छ ।