बजार मूल्य आकाशिएपछि जिल्ला दररेट पुनरावलोनको माग

रुकुम पश्चिमका निर्माण व्यवसायीहरुले बजारमा पेट्रोलियम पदार्थको मुल्यबृद्धि आकाशिएको भन्दै जिल्ला दररेर पुनरावलोनको माग गरेका छन् । 

निर्माण व्यवसायी संघको तर्फबाट प्रमुख जिल्ला अधिकारी दिनेश प्रसाद थानी समक्ष ज्ञापनपत्र बुझाउँदै व्यवसायीहरुले जिल्ला दररेट पुनरावलोनको माग गरेका हुन् । 

निर्माण व्यवसायी संघका जिल्ला अध्यक्ष परवीर डाँगीले मध्यपूर्वमा जारी युद्धका कारण विकास निर्माण कार्यमा व्यापक रुपले प्रयोग हुने पेट्रोलियम पदार्थहरु डिजेल, पेट्रोल, विटुमिन लगायतका निर्माण सामाग्रीहरुमा अप्रत्याशित रुपमा मूल्य बृद्धि भएको जनाउनुभयो । निरन्तर रुपमा भईरहेको मूल्य बृद्धिको कारण निर्माण उद्योगमा असर परेको जनाउनु हुँदै अध्यक्ष डाँगीले त्यसको प्रत्यक्ष असर विकास निर्माण कार्यमा देखिने उल्लेख गर्नुभयो । 

उहाँले अत्याधिक र अप्रत्याशिल मूल्य बृद्धिपछि महासंघको गम्भिर ध्यानाकर्षण भएको समेत बताउनुभयो । मूल्य बृद्धिपछि निर्माण कार्य सम्पन्न गर्न नसकिने व्यवसायीहरुको भनाइ छ । 

अध्यक्ष डाँगीले मूल्य समायोजन नभएसम्म निर्माण कार्य सम्पन्न गर्न नसकिने कुरा प्रमुख जिल्ला अधिकारीलाई जानकारी गराएको जनाउनुभयो । प्रजिअ समक्ष पेश गरिएको ज्ञापनपत्रमा जिल्ला प्रशासन कार्यालय अन्र्तगत गठित जिल्ला दररेट समितिको बैठकवाट हाल बजारमा भएको पेट्रोलियम पदार्थ लगायतका निर्माण सामाग्रीहरुमा १० प्रतिशत भन्दा बढी मूल्यवृद्धिलाई सम्बोधन हुने गरी विद्यमान दर रेटको पुनरावलोकन गरी मूल्यवृद्धि भएको दररेट कायम गरिदिन अनुरोध गरिएको छ ।