मध्यपहाडी राजमार्गकै पुल तेह्र वर्षदेखि अलपत्र 

जिम्मेवार निकायको लापरबाही तथा वेवास्ताले सार्वजनिक सेवा तथा विकासको योजना कतिसम्म लथालिङग हुन्छ भन्ने गतिलो उदाहरण हो मध्यपहाडी राजमार्गमा अलपत्र रहेको भेरीनदिको पुल । रुकुम पश्चिम र जाजरकोट जोड्ने यो पुल निर्माणको जिम्मा पाएको ठेकेदार कम्पनीले तोकिएको समयमै काम गरिदिएको भए २०७२ सालमै तयार हुने थियो । 

मध्यपहाडी राजमार्ग आयोजना कार्यालयले तीन वर्षभित्र निर्माण सम्पन्न गर्ने गरी २०६९ सालमा वाईपी कन्ट्रक्सन प्रा.लि.सँग ठेक्का सम्झौता गरेको यो पुल अझैसम्म निर्माण भएको छैन । सम्झौता भएको तेह्र वर्ष बित्दा पनि पुल निर्माणको काम अलपत्र छ ।

जसको कारण राष्ट्रिय गौरवको आयोजनामा पर्ने मध्यपहाडी राजमार्गको रुकुमपश्चिम र जाजरकोट खण्ड जोडिन पाएको छैन । चौरजहारी नगरपालिका –२ अधेरेबाट जाजरकोटको भेरी नगरपालिका –१३ कुदु जोड्नेगरी भेरीनदि माथि निर्माण थलिएको यो पुलकोे दुवैतर्फ आधार पिलर मात्रै खडा गरिएको छ ।  

नयाँ ठेक्काको तयारी 

मध्यपहाडि राजमार्ग योजना कार्यालय दैलेखका प्रमुख निरञ्जन थापाका अनुसार उक्त पुल निर्माणको लागि नयाँ ठेक्काको तयारी भईरहेको छ । योजना कार्यालयको तर्फबाट साबिकको डिजाईनमा केहि थप भएर स्वीकृतिको लागि सडक विभागमा पठाईएको र सम्भवतः यसैबर्ष टेण्डर आह्वान हुने उहाँले जनाउनुभयो । पुल निर्माणस्थलमा नदिको भाग पहिला भन्दा बढेकोले आवश्यक तटबन्धसहितको डिजाईन तयार भएको छ । 

प्रथम पटक भएको ठेक्का सम्झौता रद्ध गरेपछि दुई पटक टेण्डर आह्वान भएको तर ठेक्का लाग्न नसकेको उहाँले जनाउनुभयो । एक पटक बढी लागतको प्रस्ताव आउँदा सम्झौता हुन सकेको थिएन भने एक पटक कसैले पनि ठेक्काको लागि प्रस्ताव नगरेको कार्यालयले जनाएको छ ।

पुल नबन्दा सडक आयोजनाको स्तरोन्नति र कालोपत्रेको कामसमेत प्रभावित भएको छ भने मध्यपहाडी राजमार्गको रुकुमपश्चिम खण्डबाट जाजरकोट यातायातका साधनहरु आउआउ गर्ने बाटो समेत खुलेको छैन । 

धरौटी जफत

प्रथम पटक ठेक्का सम्झौता गरेको निर्माण व्यवसायीले काम नगरेपछि सम्झौता भएको दश वर्षपछि २०७९ मङसिर २९ गते नै वाईपी कन्स्ट्रक्सन प्रा.लिसँगको ठेक्का तोडिएको थियो । ठेक्का तोडिएसँगै ७२ लाख धरौटी र दुई करोड ६० लाख पेश्की रकम पनि जफत भएको थियो ।

यसका साथै सार्वजनिक खरिद नियमावली, २०६३ अनुसार उक्त ठेकेदार कम्पनीलाई आठ करोड ५७ लाख ९५ हजार ६२६ रुपियाँ जरिवाना तोकिएको थियो । १८ करोड स्टामेट रहेको यो ठेक्कामा सम्झौता गर्ने वाईपी कन्ट्रक्सनका प्रोपराइटर राजु श्रेष्ठको निधनपछि पुल निर्माणको काम अलपत्र रहेको बताईएको छ ।