रुकुम पश्चिमका सुरक्षा निकायमा प्रमुखहरु सम्मानित

रुकुम पश्चिमस्थित जिल्ला सुरक्षा समितिका सदस्यहरुलाई सम्मान गरिएको छ । प्रमुख जिल्ला अधिकारी एवम् जिल्ला सुरक्षा समितिका प्रमुख दिनेश प्रसाद थानीले विभिन्न चार सुरक्षा निकायका प्रमुखहरुलाई प्रशंसा पत्रसहित सम्मान गर्नुभएको हो । 

फागुन २१ मा सम्पन्न प्रतिनिधि सभा सदस्य निर्वाचनलाई सम्पन्न गराउन विभिन्न तवरले उत्कृष्ट भूमिका निर्वाह गरेको भन्दै उहाँहरुलाई सम्मान गरिएको हो ।

प्रजिअ थानीले चण्डीदल गणका गणपति प्रमुख सेनानी बिनिश श्रेष्ठ, जिल्ला प्रहरी कार्यालयका प्रहरी नायब उपरीक्षक बेदबहादुर पौडेल, सशस्त्र प्रहरी बल नेपाल ४७ नं. गुल्मका गुल्मपति सशस्त्र प्रहरी नायब उपरीक्षक जगदिशचन्द्र हमाल र राष्ट्रिय अनुसन्धान विभाग जिल्ला कार्यालयका प्रमुख अनुसन्धान अधिकृत नेब बहादुर रानालाई सम्मान गर्नुभएको हो । 

उहाँहरुलाई प्रशंसा पत्र र दोसल्लाले सम्मान गरिएको हो । निर्वाचनमा रुकुम पश्चिमपनि संवेदनशिल जिल्लाको रुपमा रहेको थियो । सुरक्षा समितिका सदस्यहरुको निरन्तर क्रियाशिलता, उत्कृष्ट जिम्मेवारीवहनका कारण निर्वाचन पूर्ण रुपमा सफलतापूर्वक सम्पन्न भएको प्रमुख जिल्ला अधिकारी थानीले जनाउनुभयो । 

कार्यक्रममा प्रमुख जिल्ला अधिकारी थानीले प्रतिनिधिसभा सदस्य निर्वाचन २०८२ लाई स्वतन्त्र, निष्पक्ष तथा भयरहित वातावरणमा सफलतापूर्वक सम्पन्न गराउन सुरक्षा निकायका प्रमुखहरुले उल्लेखनिय भूमिका निर्वाह गरेको बताउनुभयो ।

निर्वाचनमा उच्च व्यवसायिकता प्रदर्शन गरी, पूर्ण अनुशासित भई, आफ्नो पदीय जिम्मेवारीप्रति समर्पित रही, प्रशासन र अन्य सुरक्षा निकायसँग प्रभावकारी समन्वय गरेर समग्र सुरक्षा व्यवस्थापनमा उत्कृष्ट कार्य सम्पादन गर्नुभएकोमा उहाँहरुको योगदानको उच्च कदर गरेर प्रशंसा पत्र प्रदान गरिएको उहाँले उल्लेख गर्नुभयो ।  

कार्यक्रममा सम्मानित सुरक्षा निकायका सबै सदस्यहरुले आफ्नो भनाइ राख्नुभएको थियो । उहाँहरुले प्रमुख जिल्ला अधिकारीको कुशल नेतृत्वदायी भूमिका, अभिभावकिय मार्गनिर्देशनको कारण निर्वाचन सुरक्षामा पूर्ण सफलता प्राप्त गर्न सकेको बताउनुभयो ।

परिस्थितिको सहि बिश्लेषण, सम्भावित घटनाक्रमको पूर्व तयारी तथा योजना निर्माण र निश्पक्ष निर्देशनको कारण निर्वाचन सफलता पूर्वक सम्पन्न भएको उहाँहरुको भनाइ छ । उहाँहरुले निर्वाचनको अनुभव, जिल्ला प्रशासन कार्यालयले निर्वाह गरेको नेतृत्वदायी भूमिका लगायतका बिषयमा मन्तव्य राख्नु भएको थियो ।

आज जिल्ला प्रशासन कार्यालयमा प्रमुख जिल्ला अधिकारी दिनेश प्रसाद थानीको अध्यक्षतामा भएको प्रशंसा पत्र वितरण कार्यक्रममा सुरक्षा निकायका प्रमुखहरु लगायत कर्मचारीहरुको सहभागिता रहेको थियो ।

कार्यक्रमको सञ्चालन इलाका प्रशासन कार्यालय चौरजहारीका प्रमुख तोषराज केसीले गर्नुभएको थियो । 

यसअघि जिल्ला प्रहरी कार्यालय रुकुम पश्चिमले पनि विभिन्न दर्जाका २४ जना प्रहरी कर्मचारीहरुलाई प्रशंसा पत्र प्रदान गरेको थियो । निर्वाचनमा उत्कृष्ट भूमिका निर्वाह गर्ने कर्मचारीहरुलाई प्रशंसा पत्रले सम्मान गरिएको प्रहरी नायब उपरीक्षक बेदबहादुर पौडेलले जानकारी दिनुभयो ।