रुकुम पूर्वमा एमालेको चुनावी समिक्षा, युवाहरुलाई धन्यवाद पत्र

नेकपा (एमाले) रुकुम पूर्वले चुनावी समिक्षा गरेको छ । शनिबार फागुन २१ गते सम्पन्न निर्वाचनको समिक्षा गर्नुका साथै निर्वाचनमा परिचालन भएका युवाहरुलाई धन्यवाद पत्र वितरण गरिएको हो ।

सामुहिक भोज समेत आयोजना गरेर युवा तथा कार्यकर्ताहरु बिच चुनावी समिक्षा गरिएको नेकपा (एमाले) का केन्द्रिय सदस्य एवम् प्रतिनिधि सभा सदस्य निर्वाचनका उम्मेदवार लिलामणि गौतमले जानकारी दिनुभयो । देशभर विजेताहरुले मात्र भोज गर्ने, समिक्षा गर्ने चलन रहेको बेला रुकुम पूर्वमा भने नयाँ अभ्यासको सुरुवात गरेको गौतमले बताउनुभयो । 

गौतम नेपाली कम्युनिष्ट पार्टीका संयोजक एवम् पूर्व प्रधानमन्त्री पुष्पकमल दाहाल प्रचण्ड लगायतका अन्य दलका उम्मेदवारहरुसँग प्रतिश्पर्धामा उत्रिनु भएको थियो । 

निर्वाचनमा पराजित हुँदा पनि नयाँ संस्कारको विकास गर्ने उद्धेश्यले निर्वाचनमा परिचालन भएका ६० जना युवाहरुलाई धन्यवाद पत्र उपलब्ध गराईएको गौतमले जानकारी दिनुभयो । विजेता उम्मेदवार हेलिकोप्टर चढेर काठमार्डौ फर्किएको बेला आफुले भने गाउँमा पुगेर मतदाता भेटघाट तथा धन्यवाद कार्यक्रम गरिरहेको उहाँले जनाउनुभयो ।

पार्टी र आफ्नो चुनावी अभियानमा साथ दिएर महत्वूपूृर्ण भूमिका निर्वाह गर्ने विभिन्न जिम्मेवारी सम्हाल्नु भएका युवाहरुलाई धन्यवााद पत्र दिनुका साथै चुनावी समिक्षा र आगामी कार्यदिशा बारेमा छलफल गरिएको गौतमले उल्लेख गर्नुभयो । 

नेकपा (एमाले) रुकुम पूर्वका कार्यबहाक अध्यक्ष गोपाल रेउलेको अध्यक्षतामा भएको कार्यक्रममा केन्द्रिय सदस्य एवम् प्रतिनिधि सभा सदस्य निर्वाचनका उम्मेदवार लिलामणि गौतमको प्रमुख आतिथ्यता र नेकपा (एमाले) रुकुम पश्चिमका अध्यक्ष नन्दराम देवकोटा, प्रदेश समितिका सल्लाहकार दामोदर पौडेलको बिशेष आतिथ्यता रहेको थियो । कार्यक्रमको सञ्चालन देविलाल गिरीले गर्नुभएको थियो ।