मुसिकोटमा नेकपाको विजयी र्‍याली सम्पन्न 

रुकुम पश्चिम । रुकुम पश्चिममा सम्पन्न प्रतिनिधि सभा सदस्य निर्वाचनमा विजय हासिल गरेपछि नेपाली कम्युनिष्ट पार्टी (नेकपा) ले मुसिकोटमा विजयी र्‍याली सम्पन्न गरेको छ।

फागुन २१ गतेको निर्वाचन परिणाम आफ्नो पक्षमा आएपछि पार्टीका नेता–कार्यकर्ता तथा समर्थकहरूले मुसिकोट बजार क्षेत्रमा विजयी र्‍याली निकाल्दै उत्सव मनाएका हुन्। र्‍यालीमा विभिन्न स्थानबाट आएका नेता, कार्यकर्ता तथा सर्वसाधारणको उल्लेख्य सहभागिता रहेको थियो।

मुसिकोटको सेरीगाउँबाट सुरु भएको र्‍याली  बजारका विभिन्न स्थान परिक्रमा गर्दै बाल मन्दिरमा पुगेर कोणसभामा परिणत भएको थियो। कार्यक्रममा नेताहरूले निर्वाचनमा जनताले दिएको समर्थनप्रति धन्यवाद व्यक्त गर्दै आगामी दिनमा जनताको विश्वासलाई सम्मान गर्दै काम गर्ने प्रतिबद्धता जनाएका थिए।

कार्यक्रममा नवनिर्वाचित प्रतिनिधि सभा सदस्य गोपाल शर्माले निर्वाचनसम्म राजनीतिक प्रतिस्पर्धा स्वाभाविक भए पनि अब सबैलाई साथमा लिएर रुकुम पश्चिमको विकास र समृद्धिका लागि काम गर्ने बताउनुभयो । उहाँले जनताले दिएको मतलाई जिम्मेवारीका रूपमा लिँदै जिल्लाको विकास, रोजगारी सिर्जना र जनजीवन सुधारका विषयमा आफ्नो ध्यान केन्द्रित रहने उल्लेख समेत गर्नुभयो । 

कार्यक्रममा नेकपाका दुई केन्द्रिय सदस्य देवि वली र वषन्त शर्माले समेट मन्तव्य राख्नुभएको थियो । 

विजयी र्‍यालीमा पार्टीका जिल्ला तथा स्थानीय तहका नेता–कार्यकर्ता, समर्थक तथा सर्वसाधारणको उल्लेख्य उपस्थिति रहेको थियो। कार्यक्रममा सहभागीहरूले पार्टीको जितप्रति खुसी व्यक्त गर्दै नाराबाजी समेत गरेका थिए।