मुसिकोटमा निर्वाचन लक्षित आकस्मिक अनुगमन

रुकुम पश्चिमको जिल्ला सदरमुकाम मुसिकोटको मुख्य बजार क्षेत्रमा निर्वाचन लक्षित अनुगमन गरिएको छ । 

जिल्ला सुरक्षा समिति र निर्वाचन आचारसंहिता अगुनगमन समितिले निर्वाचन आचारसंहितालाई ध्यानमा राखेर मुसिकोटको खलंगा, बागबजार र पातुखोला बजार क्षेत्रमा रहेका फेन्सी पसलहरुमा अनुगमन गरेको हो ।  

प्रमुख जिल्ला अधिकारी दिनेशप्रसाद थानीको नेतृत्वमा बजार अनुगमन गरिएको हो । सहायक प्रमुख जिल्ला अधिकारी एवम् निर्वाचन आचारसंहिता अगुनगमन अधिकृत केशव प्रसाद ओलीले होली पर्वमा निर्वाचन आचारसंहिताले बन्देज गरेका वस्तुहरुमो बिक्री हुन नदिने उद्देश्यले बजार अनुगमन गरिएको बताउनुभयो । टोलीले एक दर्जन बढी पसलहरुको अनुगमन गरेको हो । 

उहाँका अनुसार अनुगमनका क्रममा बजारमा बिक्री गर्न राखिएका दलका झन्डा, उम्मेदवारको फोटो तथा निर्वाचन चिन्ह अङ्कित टिसर्टहरू हटाइएको छ । निर्वाचन आचारसंहिता अनुसार त्यस्ता टिसर्ट लगाउन नपाइने भएकोले उक्त सामग्री हटाइएको हो ।  

बिक्रीका लागि पसलमा झुन्ड्याइएका टिसर्ट हटाउनुका साथै पसल भित्र राखिएका टिसर्ट बिक्री नगर्न व्यवसायीहरूलाई निर्देशन गरिएको ओलीले जनाउनुभयो ।  निर्वाचन आचारसंहिता विपरीत त्यस्ता सामग्री बिक्री भएको पाइएमा बिक्री गर्ने र प्रयोग गर्ने दुबैलाई कारबाही गर्ने प्रशासनले चेतावनी दिएको छ । 

अनुगमनमा प्रमुख जिल्ला अधिकारी दिनेश प्रसाद थानी, प्रहरी नायब उपरीक्षक बेदबहादुर पौडेल, सशस्त्र प्रहरी नायब उपरीक्षक जगदिशचन्द्र हमाल, प्रमुख अनुसन्धान अधिकृत नेबहादुर राना, सहायक प्रमुख जिल्ला अधिकारी केशव प्रसाद ओली लगायत सुरक्षाकर्मीको उपस्थिति रहेको थियो ।