नेकपा (माओवादी) रुकुम पश्चिमको चुनावी प्रतिबद्धता सार्वजनिक

ने.क.पा. माओवादी रुकुम पश्चिमले यहि फागुन २१ गते हुने प्रतिनिधि सभा सदस्य निर्वाचन लक्षित प्रतिबद्धता सार्वजनिक गरेको छ । 

आज रुकुम पश्चिमको मुसिकोटमा पत्रकार सम्मेलन गरेर माओवादीले आफ्नो चुनावी प्रतिबद्धता सार्वजनिक गरेको हो । 

उम्मेदवार चन्द्र बहादुर बुढाले रुकुम पश्चिमको आत्मनिर्भरता सहितको समृद्धि, समान विकास र जनताको पूर्ण अधिकारका लागि इमान्दरपूर्वक काम गर्ने बताउनुभयो । उहाँले आफूले जनताको सेवक र मार्गदर्शन गर्न सक्ने योग्य वैचारिक दृष्टिकोणमा स्पष्ट दुरदृष्टियोग्य नेतृत्वको अभाव हुन नदिने समेत बताउनुभयो । 

१३ बुँदे प्रतिबद्धता पत्रमा ग्रामीण अर्थतन्त्र (कृषि, पर्यटन क्षेत्रको विकास, जलविद्युत क्षेत्रको विकास, बहुमुल्य जडिबुटी, बनस्पतीको व्यवसायिक खेती, यसको संरक्षण र सम्बद्र्धन), शिक्षा, स्वास्थ्य सेवा, नागरिक रोजगारी, लघु तथा सीपमुलक व्यवसाय, सञ्चार क्षेत्र र सडक तथा पूर्वाधारका क्षेत्रमा गर्न सकिने कामहरु उल्लेख गरिएको छ । 

त्यसैगरी युवा तथा खेलकुद, सामाजिक विकास, सुशासन, कला, साहित्य र संस्कृतिको विकास, पर्यावरण, दिगो विकासको अवधारणमा आधारित स्मार्ट ग्रामीण गाउँ र ग्रामीण सहरको विकास र यातायात र सूचना सञ्चार क्षेत्रमा गरिने योजनाहरुको बारेमा प्रतिबद्धता गरिएको छ । 

उम्मेदवार बुढाले “रुकुमको विकास – जनताको अधिकार”, “कृषि , पर्यटन, जलविद्युत र पूर्वाधार – आत्मनिर्भर रुकुमको आधार”, “रोजगार शिक्षा र स्वास्थ्य हाम्रो – पहिलो प्राथमकिता” भन्ने नाराका साथ बिशेष प्रतिबद्धताहरु सार्वजनिक गर्नुभयो ।

यसका साथै उहाँले जनतासँग झुठो आश्वास नदिने, जनताकै बिचमा रहने, विकासलाई गति दिने र रुकुम पश्चिमलाई नमूना जिल्ला बनाउने वाचा समेत गर्नुभएको छ । 

पार्टीका जिल्ला केन्द्रिय सदस्य हरि पुनको अध्यक्षतामा भएको प्रतिबद्धता सार्वजनिक कार्यक्रमको सञ्चालन जिल्ला सचिव महेश बस्नेतले गर्नुभएको थियो ।