एमाले रुकुम पश्चिमका जिल्ला सदस्यसहित चार जना नेकपामा प्रवेश

नेकपा (एमाले) रुकुम पश्चिमका जिल्ला सदस्यसहित चार जनाले पार्टी परित्याग गर्नुभएको छ । जिल्ला कमिटी सदस्य पैलभान घर्तीसहित चार जनाले पार्टी परित्याग गरेर नेपाली कम्युनिष्ट पार्टी (नेकपा) मा प्रवेश गर्नुभएको हो । 

आज नेकपाले आठबिसकोट नगरपालिका १ मा गरेको चुनाव लक्षित जनभेटघाट तथा अन्तरक्रिया कार्यक्रमको अवसरमा उहाँहरुले एमाले त्यागेर नेकपामा प्रवेश गर्नुभएको नेकपाका युवा नेता तुल देवकोटाले जानकारी दिनुभयो ।

उहाँका अनुसार घर्तीसहित आठबिसकोट नगरपालिका वडा नम्बर १ का पूर्व वडा अध्यक्ष कर्णबहादुर बुढा, एमालेका कार्यकर्ताहरु धनबहादुर बुढा र कमला बोहराले एमाले परित्याग गरेर नेकपामा प्रवेश गर्नुभएको छ । 

उक्त अवसरमा बोल्नुहुँदै जिल्ला सदस्य घर्तीले २०४७ सालदेखि एमालेमा आबद्ध भई विभिन्न जिम्मेवारी पुरा गरेको तर अहिले पार्टीका कार्यक्रममा कुरा राख्न मिल्ने अवस्था नभएको बताउनुभयो ।

उहाँले प्रतिनिधि सभा सदस्य निर्वाचनमा पार्टीले उठाएका उम्मेदरवार प्रगतिशिल लोकतान्त्रिक पार्टीका उम्मेदवार जिताउन लागि परेको तर उक्त कुरा पार्टी पंक्तिमा छलफल नभई कार्यकर्ताको मनोभावना विपरित काम भएको जनाउनुभयो । 

जिल्ला पार्टी अध्यक्षले एमालेलाई प्रलोपामा समिकरण गरेको र गैर कम्युनिष्टसँग मिलेकोले आफूलाई चित्त नबुझेको घर्तीले बताउनुभएको छ । 

एमाले पार्टी छोडेर नेकपामा प्रवेश गरेका नवप्रवेशीहरुलाई प्रतिनिधि सभा सदस्यका उम्मेदवार गोपाल शर्मा, केन्द्रिय सदस्य बसन्त कुमार शर्मा लगायतले स्वागत गर्नुभएको छ । 

यसअघि एमाले निकट नेपाल शिक्षक संगठनका पूर्व केन्द्रिय उपाध्यक्ष संगम केसी र जिल्ला सचिव टिकाराम बिष्टले समेत पार्टी र संगठन त्याग गरेर नेकपामा प्रवेश गर्नुभएको थियो ।