३१ वर्षपछि बिरासत फर्काउने दाउमा रुकुम कांग्रेस

तत्कालिन माओवादीले सञ्चालन गरेको सशस्त्र जनयुद्धपछि संसदमा प्रतिनिधित्वविहिन हुन पुगेको रुकुम पश्चिम कांग्रेस तीन दशकपछि पुरानो बिरासत फर्काउने दाउमा रहेको छ ।

यहि फागुन २१ गते हुने प्रतिनिधि सभा सदस्य निर्वाचनमा परिवर्तन र सुशासनको मुख्य नारा बोकेर यतिबेला घरदैलो अभियान गरिरहेको कांग्रेसले युवा व्यवसायी राजु केसीलाई उम्मेदवारको रुपमा अघि सारेको छ । 

नेपाली कांग्रेसका जिल्ला सहसचिव यज्ञ बिष्टका अनुसार २०५१ सालको मध्यावधि निर्वाचनमा जीत निकालेको कांग्रेस त्यसपछिका निर्वाचनबाट संसदीय यात्रामा पराजय भोग्दै आएको छ । यसपटक भने आफ्नो पुरानो विरासत फर्काउने वातावरण बनेको उहाँको भनाइ छ । उहाँले ठुला दलहरुमा भएको विभाजन, नयाँ दलहरुको उदय र नयाँ उम्मेदवारको आगमनले कांग्रेस जीतको दाउमा रहेको दाबी गर्नुभयो ।  

सशस्त्र द्वन्द्वताका तत्कालिन बिद्रोहीको प्रमुख निशानामा रहेको कांग्रेसले २०५६ सालको निर्वाचनमा हार बेहोरेको थियो । दुई निर्वाचन क्षेत्र रहेको बेला २०५६ सालको निर्वाचनमा एक निर्वाचन क्षेत्र नेकपा (एमाले)ले जितेको थियो ।

त्यसपछि शान्ती प्रक्रियापछिका सबै निर्वाचनमा तत्कालिन नेकपा माओवादी केन्द्रको एकछत्र जीत हुँदै आएको थियो । २०६४ र २०७० सालमा भएको पहिलो र दोश्रो संविधान सभा निर्वाचन र त्यसपछि २०७४, २०७९ मा सम्पन्न प्रतिनिधि सभा सदस्य निर्वाचनमा माओवादीकै जीत भएको थियो । 

मतपरिणामको हिसाबले जिल्लामा दोश्रो अवस्थामा रहदै आएको कांग्रेसले यतिबेला नेकपा (एमाले) र माओवादी केन्द्रमा भएको विभाजनको फाईदा उठाउने दाउ गरेको छ । उम्मेदवार राजु केसीले भदौ २३ र २४ को जेनजी आन्दोलनको मर्म, पुस्तान्तरणको माग, सुशासनको आवश्यकताको हिसाबले आफु उपर्युक्त पात्र भएकोले मतदाताले आफुलाई जिताउनेमा ढुक्क रहेको बताउनुभयो ।

गाउँमा घरदैलो अभियानमा जाँदा बुढापाखाहरुले दिएको आशिर्वाद, युवाहरुले दिएको साथ र आम मतदाताले दिएको हौसलाले आफु अनुकुलको चुनावी वातावरण रहेको केसीको ठम्याई रहेको छ । 

लामो समयमसम्म एउटै दलको दवदबा हुँदा विकासका कार्यहरु तिब्र हुन नसकेको, जनताको गुनासाहरु ब्याप्त रहेको उहाँले उल्लेख गर्नुभयो । घरदैलो अभियानमा आफ्नो योजना सुनाउने, जनताका मागहरु सुन्ने काम भईरहेको केसीको भनाइ छ । 

करिब तीन दशक वामपन्थी राजनीतिको केन्द्र भित्र रहेको रुकुम पश्चिममा प्रजातान्त्रिक शक्तिको उदय हुने कांग्रेसजनको भनाई छ ।

विगतको निरन्तरता भन्दा पनि परिवर्तनको लागि विकल्प रोजेको नयाँ पुस्ताको प्रतिक्रिया रहेको छ । 

पूर्व माओवादी नेताहरूको अलग राजनीतिक यात्रा, पुराना दलमा पनि नयाँ पुस्ताको उदय, नयाँ दल गठन लगायतले रुकुम पश्चिमको निर्वाचन परम्परागत राजनीतिक शक्ति, नयाँ राजनीतिक दल र वैकल्पिक राजनीतिक धारबीचको प्रतिस्पर्धाका रूपमा विकसित भएको छ ।