वित्तीय शोषण बिरुद्ध लड्दालड्दै निर्वाचनमा होमिएकी रुकुमकी एक्ली महिला उम्मेदवार

रुकुम पश्चिमको मुसिकोट नगरपालिका –१ निवासी ४४ बर्षीया प्रेमा दमाई नेपाली आगामी फागुन २१ मा हुने प्रतिनिधि सभा सदस्य निर्वाचनमा जिल्लाको एक मात्र पहिला उम्मेदवार हुनुहुन्छ । 

लघुबित्त तथा वित्तीय शोषण बिरुद्ध संघर्षरत प्रेमा 'आम जनता पार्टी'बाट मोबाईल चिन्ह लिएर चुनावी मैदानमा होमिनुभएको छ । गाउँ गाउँमा लघुवित्तले गरेको ज्यादती तथा चर्को ब्याजदर बिरुद्ध लड्दालड्दै उनीहरुको न्यायको लागि चुनावी मैदानमा होमिनु परेको उहाँले जनाउनुभयो । 

उहाँले जिल्लाबाट काठमाडौंसम्म पुगेर पीडितहरुको न्यायको लागि लडिरहेको र न्याय दिलाउन पीडितहरुकै साथ खोजिरहेको बताउनुभयो ।

आफ्नो उम्मेदवारी बारेमा प्रेमाले भन्नुभयो, “लघुबित्त तथा वित्तीय शोषण बिरुद्धको संघर्ष समितिमा रहेर सक्रिय भईरहेको बेला देशभर जेनजी आन्दोलन भयो । आन्दोलनबाट नयाँ सरकार बन्यो । हामीले वर्तमान प्रधानमन्त्रीलाई भेट्न गयौ, चुनाव जितेर पीडितका माग संसदमा पुर्याउनु पर्ने र समाधान गर्नुपर्ने अवस्था आयो । हामीले पनि पीडितहरुको आवाज एकिकृत गर्न चुनावमा आयौ ।”

रुकुम पश्चिममा आम जनता पार्टीको संगठन र संरचना नै नभएको बेला चुनावी परिणाम आफ्नो पक्षमा आउन सक्ने अवस्था के देख्नुहुन्छ भनेर मूलपाटीले सोधेको प्रश्नमा प्रेमाले आम मतदाताहरु मध्य जिल्लामा महिला मतदाताहरुको उपस्थिति बढी रहेको, महिलाहरु नै थिचोमिचोमा रहेको, लघुबित्त तथा घरेलु हिंसाबाट पीडित रहेकोले आफ्नो न्यायको लागि पनि महिला उम्मेदवारलाई मत दिनुहुने विश्वास रहेको बताउनुभयो । यसका साथै पुरुषहरु समेत लघुबित्त तथा सहकारीबाट पीडित भएकोले उहाँहरुले आफ्नो न्यायको लागि आफूलाई सहयोग गर्ने अवस्था रहेको प्रेमाले उल्लेख गर्नुभयो । 

प्रेमा अहिले लघुवित्त तथा वित्तीय शोषण बिरुद्धको संघर्ष समितिको जिल्ला सचिव हुनुहुन्छ । यस अघि वित्तीय संस्थाले गरेको शोषण विभिन्न राजनीतिक दललाई सुनाउन वेवास्ता गरेको उहाँले सुनाउनुभयो । 

अन्यायमा परेकाहरुको न्याय, जेनजी आन्दोलनको मर्म, सम्पूर्ण बैंक तथा बित्तीय संस्थाहरुको राष्ट्रियकरण, लघुबित्त, सहकारी, बैंक तथा बित्तीय संस्थाहरुद्वारा लगाईएको अन्यायपूर्ण सामुहिक ऋणको मिनाहको मुद्धा लिएर आफु चुनावमा गएको उहाँले बताउनुभयो । नेता बनेर उदाउने चन्दा पनि चरम आर्थिक अवस्थामा दैनिकी धकेलिरहेका, वित्तीय संस्थाको चर्को ऋणको तनाव झेलिरहेका आम सर्वसाधारणहरुलाई डिप्रेशन तथा मृत्युको मुखबाट जोगाउन चुनावी मैदानमा आउनु परेको उहाँले उल्लेख गर्नुभयो । 

यसका साथै सामुहिक कर्जा प्रणालीको अन्त्य गर्न, आम गरिब किसान र मजदुरहरुको ब्याज छुटसहितको ऋण प्रदान गर्न, मिटरब्याजी तमसुक रद्ध गर्न, आवश्यकता र क्षमतामा आधारित काम र दामको व्यवस्था गर्न, गुणस्तरिय शिक्षा र स्वास्थ्य क्षेत्रलाई पूर्ण रुपमा निशुल्क गर्न आफूले उम्मेदवारी दिएको उहाँले बताउनुभयो । 

समानुपातिक तर्फको उम्मेदवार कर्मी केसीको साथमा गाउँगाउँमा मत माग्दै हिड्नु भएकी प्रेमाले संघर्ष समितिले गरेको आन्दोलनको प्रभाव गाउँमा र बैकमा देखिन थालेको बताउनुभयो । उहाँले आन्दोलनकै कारण बैंकले लिनेको गरेको ब्याजदर घटेको, सेवा शुल्क कम गरेको र दिनहुँ लघुुवित्तका कर्मचारीहरुले दिने तनाव कम भएको बताउनुभयो । 

यस अघि जिल्लास्तरमा लघुवित्त पीडितको न्यायको लागि नाराबाजि, धर्ना, अनसन लगायतका कार्यमा सक्रिय हुनुभएकी प्रेमा र कर्मा अहिले मत माग्दै, पीडितहरुको साथ जुटाउँदै हिडिरहनुभएको छ ।