पूर्वमुख्यमन्त्री राजकुमार शर्मालाई प्रदेशसभा सदस्यबाट हटाउन पत्राचार

नेपाली कम्युनिस्ट पार्टी (नेकपा) ले कर्णाली प्रदेशका पूर्वमुख्यमन्त्री राजकुमार शर्मालाई पार्टीको साधारण सदस्यसमेत नरहने गरी निष्कासन गरेको छ ।

माघ २६ मा बसेको नेकपाको केन्द्रीय समिति बैठकले शर्मालाई पार्टीको साधारण सदस्यसमेत नरहने गरी निष्कासन गरेको हो ।

नेकपाको कर्णाली प्रदेश संसदीय दलको बैठकले शर्मालाई प्रदेशसभा सदस्यबाट पनि हटाउने भएको छ । नेकपा संसदीय दलका प्रमुख सचेतक कृष्ण जिसीले प्रदेशसभा सदस्यबाट निष्कासन गरेको जानकारी गराउँदै उनले प्रदेशसभा सचिवालयलाई पत्र पठाइएको जानकारी दिनुभयो ।

जिसीका अनुसार प्रदेशसभा सचिवालयलाई जानकारी दिइएको पत्रमा नेता शर्मा पार्टीको नीति, सिद्धान्त, उद्देश्य र आचरणविपरित गतिविधिमा संलग्न भएको उल्लेख गरिएको छ । सोही आधारमा उनलाई केन्द्रीय समिति लगायत सम्पूर्ण जिम्मेवारीबाट हटाउँदै पार्टी सदस्यताबाट निष्कासन गरिएको जनाइएको छ ।

पत्रमा राजनीतिक दलसम्बन्धी ऐन, २०७३ को दफा ३२ को उपदफा (२) र (५) बमोजिम पार्टी सदस्यबाट निष्कासन भएपछि प्रदेशसभा सदस्य पद समेत नरहने कानुनी व्यवस्था रहेको उल्लेख गर्दै आवश्यक कारबाही गर्न प्रदेशसभा सचिवालयलाई अनुरोध गरिएको जनाइएको छ ।

शर्मा तत्कालीन नेकपा (माओवादी केन्द्र) बाट कर्णाली प्रदेशको मुख्यमन्त्री हुनुभएको थियो । उहाँले केही महिनाअघि दल नेताबाट राजीनामा समेत दिईसक्नु भएको छ । 
माओवादी केन्द्र एकता प्रक्रियामा गएपछि उहाँ एकता पक्रियामा नगएर नयाँ खुलेको प्रगतिशिल लोकतान्त्रिक पार्टीमा सक्रिय हुनुभएको छ ।