'जनलहर' बढाउँदै जनार्दन

रुकुम पश्चिममा आसन्न प्रतिनिधीसभा सदस्य निर्वाचनमा प्रगतिशिल लोकतान्त्रिक पार्टी (प्रलोपा)का उम्मेदवार जनार्दन शर्माको चुनावी अभियान तिब्र रुपमा भईरहेको छ । 

साबिक नेकपा (माओवादी) केन्द्र एकता प्रक्रियामा गएपछि नयाँ पार्टी प्रलोपा स्थापना गर्नुभएका शर्माले खुलेको एकल आँखा चुनाव चिन्ह लिएर चुनावी मैदानमा उत्रिनु भएको छ । नयाँ पार्टी निर्माण र वडास्तरमा संगठन निर्माणको बेला चुनावमा होमिएकोले कमजोर देखिएको शर्माको जनमत नेकपा (एमाले) को समर्थनपछि बढ्दै गएको देखिन्छ । 

शर्माको चुनावी कमाण्डर नेकपा (एमाले)का जिल्ला अध्यक्ष नन्दराम देवकाेटा हुनुहुन्छ । देवकाेटाले आफ्नो उम्मेदवारी निश्क्रिय पारेर जनार्दनको पक्षमा मत माग्दै घरदैलोमा हुनुहुन्छ । तर, आफ्नै पार्टी भित्रका असन्तुष्ट कार्यकर्ताहरु मिलाउन वेवास्ता गरिएको कार्यकर्ताहरुको गुनासो रहेको छ । 

जिल्लाको बाँफिकोट, आठबिसकोट, सानीभेरी, चौरजहारी हुँदै त्रिवेणी गाउँपालिकामा घरदैलो गरिरहेको प्रलोपाले साबिक माओवादी केन्द्रका कार्यकर्ताहरु आफ्नो पक्षमा ल्याउन कोशिस गरिरहेको छ । जनार्दनको पक्षमा दैनिक जनलहर बढीरहेको प्रलोपाका नेताहरुको भनाई छ । 

घरदैलो अभियानमा शर्माले विगतमा जिल्लाको अभिभावकत्व कुशलतापूर्वक निभाएको र बाँकि कार्यभार पुरा गर्न अन्तिम पटक चुनावी मैदानमा उत्रिएको बताउनुभएको छ । उहाँले जिल्लामा गरेका विकास निर्माणका पहलकदमीहरु जानकारी गराउँदै नयाँ पार्टी खोल्नुको बाध्यता समेत प्रष्ट पार्दै जनमत मागिरहेको देखिन्छ । 

त्रिवेणीका विभिन्न वडाहरुमा पुगेर जनताका कुरा सुन्ने, आफ्ना योजना सुनाउने र जनतासँगै रमाउने प्रलोपाका उम्मेदवार शर्माको पक्षमा साबिकका माओवादी कार्यकर्ता बढीरहेको देखिन्छ ।