चौरजहारीमा नेकपाको चुनावी अभियान : गृह नगरमा उम्मेदवार शर्मालाई भव्य स्वागत, कार्यकर्तामा उत्साह

आसन्न प्रतिनिधीसभा सदस्य निर्वाचनलाई लक्षित गरेर नेपाली कम्युनिस्ट पार्टी (नेकपा) रूकुम पश्चिमले सञ्चालन गरेको जनभेटघाट तथा घरदैलो कार्यक्रम आजबाट चौरजहारीमा सुरु भएको छ । 

नेकपाका उम्मेदवार गोपाल शर्माको गृह नगरसमेत रहेको चौरजहारीमा चुनावी अभियान टोलीलाई स्थानीय कार्यकर्ताहरुले भव्य स्वागत गरेका छन् । 

वडा नम्वर ३ को स्यालखोलाबाट सुरु भएको नाराबाजी तथा बाजागाजासहितको टोली वडा नम्वर २ हुँदै वडा नम्वर १ सम्मप पुगेको नेकपाका युवा नेता सुन्दर शर्माले जानकारी दिनुभयो । स्थानीयले उम्मेदवार शर्मासहितको चुनावी अभियान टोलीलाई अबिर, फूलमाला, बाजागाजासहित भव्य स्वागत गरेका छन् । 

स्थानीय जनसमुदायको उत्साहपूर्ण सहभागिताले चुनावी माहोल थप तातिएको शर्माले उल्लेख गर्नुभयो । साे अवसरमा स्थानीयसँग प्रत्यक्ष भेटघाट गरेर उम्मेदवार शर्मा लगायतको टोलीले विकास र समृद्धिका लागि काम गर्ने प्रतिबद्धता जनाएका छन् ।

उम्मेदवार शर्माले जिल्लाको समग्र विकासको योजना तय गरिएको र शिक्षा, स्वास्थ्य, सडक, खानेपानी, रोजगारी र कृषि क्षेत्रलाई प्राथमिकतामा राखेर काम गर्ने बताउनुभयो । उहाँले जनताका दैनिक समस्या बुझ्न र समाधानका उपाय खोज्न घरदैलो कार्यक्रम मार्फत फिल्डमा आएको बताउनुभयो । जनताको साथ र विश्वासले मात्र समृद्ध र न्यायपूर्ण समाज निर्माण हुने उहाँको भनाई छ । 

जनभेटघाट तथा घरदैलो कार्यक्रम केहि केहि चौरजहारीमै केन्द्रित हुने बताईएको छ । आजको कार्यक्रमले चौरजहारीमा नेकपाप्रतिको समर्थन र उत्साह थप मजबुत भएको बताईएको छ ।

यस अघी नेकपाले मुसिकोट नगरपालिका, बाँफिकोट गाउँपालिका र सानीभेरी गाउँपालिकामा जनभेटघाट तथा घरदैलो कार्यक्रम सम्पन्न गरेको छ ।