आचारसंहिता पालना गर्न प्रशासनको आग्रह, उल्लंघन गरे उम्मेदवारी रद्ध हुन सक्ने

जिल्ला प्रशासन कार्यालय रुकुम पश्चिमले निर्वाचन आचारसंहिता पालना गर्न अनुरोध गरेको छ । सहायक प्रमुख जिल्ला अधिकारी एवम् निर्वाचन आचारसंहिता अनुगमन अधिकृत केशव प्रसाद ओलीले एक प्रेस नोट जारी गरेर आचारसंहिता पालना गर्न अनुरोध गर्नुभएको हो । 

उहाँले राजनीतिक दल, उम्मेदवार, दलका भातृ संगठन, पत्रकार, नागरिक समाज र आम सर्वसाधारण नागरिकको जानकारीको लागि निर्वाचन आचारसंहिता, २०८२ जारी गरेर पालना गर्न अनुरोध गर्नुभएको हो । 

जारी गरिएको प्रेस नोटमा आसन्न प्रतिनिधि सभा सदस्य निर्वाचन, २०८२ लाई स्वच्छ, स्वतन्त्र, निष्पक्ष र भयरहित वातावरणमा सम्पन्न गर्न उम्मेदवार, राजनीतिक दल, दलका भातृ संगठन, पत्रकार र आम सर्वसाधारण नागरिकहरुको कर्तव्य एवम् दायित्व भएको उल्लेख गरिएको छ । 

प्रेस नोटमा निर्वाचन आचार संहिता, २०८२ को दफा १३ मा उल्लेखित मापदण्ड भित्र रही निर्वाचन प्रचारप्रसार सम्बन्धी काम गर्न सक्ने, प्रचलित कानून र आचारसंहिता विपरित पोष्टर, तुल, व्यानर भित्तेलेखन र डिजिटल डिस्प्ले आदि प्रयोग गर्न नहुने, कसैको निजी घर जग्गा वा सार्वजनिक भवन, उद्यान, सडकका भित्ता वा पोल वा कुनै पनि सार्वजनिक स्थानमा दलको झण्डा, दल वा उम्मेदवारको निर्वाचन चिन्ह राख वा टाँस्न नहुने, प्रचारप्रसारका लागि घरदैलो कार्यक्रम गर्दा उम्मेदवार, प्रस्तावक समर्थकसहित २५ जना भन्दा बढीको जुलुस लिएर जान नमिल्ने र साथै यसरी जाँदा बाजागाजा झाँकी सहित जानु नहुने उल्लेख छ ।

त्यसैगरी जुलुस वा आम सभामा भाग लिने वा प्रचारप्रसार गर्ने व्यक्तिले दल वा उम्मेदवारको निर्वाचन चिन्ह वा झण्डा अङ्कित लोगो वा स्टिकर वा कपडा टोपी वा क्याप, भेष्ट, टिसर्ट, ज्याकेट, कमिज, गम्छा, व्याच मास्क वा लकेट लगाउन वा झोला बोक्न नहुने, फागुन ४ गते देखि मात्र निर्वाचन प्रचारप्रसार सम्बन्धीका गतिविधि गर्न पाउने उल्लेख छ । 

प्रेस नोटमा विभिन्न १६ वटा बुँदाहरु जानकारी गराईएको छ । निर्वाचन आचारसंहिताले तोकेका व्यवस्था विपरित आचारसंहिता उल्लंघनका विषयमा निर्वाचन आचारसंहिता, २०८२ को दफा ४८ आकर्षित भई उमेदवारी रद्द हुने सम्मको सजायको व्यवस्था रहेको सहायक प्रजिअ ओलीले जानकारी दिनुभयो ।