उम्मेदवारी दर्तापछि नेकपाले मुसिकोटबाट सुरु गर्यो जनभेटघाट  

नेपाली कम्युनिष्ट पार्टी (नेकपा) रुकुम पश्चिमले मुसिकोटबाट जनभेटघाट कार्यक्रमको सुरुवात गरेको छ । 

फागुन २१ गते हुने प्रतिनिधि सभा सदस्य निर्वाचनका लागि मंगलबार मनोनयन दर्ता गरेर आजबाट नेकपाले चुनावलक्षित भेटघाट सुरु गरेको जनाएको छ ।  

उम्मेदवार गोपाल शर्मासहित पार्टीका नेताहरु मुसिकोट नगरपालिका –८ बाट जनभेटघाट केन्द्रित भएको नेकपाका मुसिकोट नगर समितिका अध्यक्ष बसन्त खड्काले जानकारी दिनुभयो । उहाँका अनुसार आज बिहान वडा नम्वर ८ को घोरखानी बस्तीबाट सुरु भएको जनभेट लसुनबारी, क्वाम्मा हुँदै वडा नम्वर ७ को साँखमा पुगेको छ । आज वडा नम्वर ७ र ८ मा भेटघाट तथा छलफल कार्यक्रम सम्पन्न गरेको खड्काले जानकारी दिनुभयो ।  

भेटघाट तथा अन्तरक्रियामा प्रत्यक्ष तर्फका उम्मेदवार शर्मासँगै समानुपातिक उम्मेदवार झक्कुप्रसाद घर्ती, पार्टीका केन्द्रिय सदस्य बिमल कुमार पुन, जिल्ला ईन्चार्ज बसन्त कुमार शर्मा, संयोजक गोबिन्द रोका लगायतको टोली रहेको छ ।  भोली झुलखेतबाट भेटघाट अभियान नियमित हुने नगर अध्यक्ष खड्काले बताउनुभयो । 

जनभेटघाटलाई बस्तीस्तरका आम कार्यकर्ता र सर्वसाधारणहरु केन्द्रित गरिएको छ । मतदाताहरुको राय तथा माग, जनस्तरको आवश्यकता, आर्थिक अवस्था सुधार र दैनिक जीवनयापनका सवाल भेटघाटका क्रममा छलफलका विषय रहेका छन् ।