म रुकुमबाटै चुनाव लड्ने निश्चित छ, भगौडाका पछि नलाग्नु : प्रचण्ड

नेपाली कम्युनिष्ट पार्टी (नेकपा) का संयोजक पुष्पकमल दाहाल प्रचण्डले आफूले रुकुमपूर्वबाट चुनाव लड्ने पक्का भएको बताउनुभएको छ । पूर्व प्रधानमन्त्री समेत रहनुभएका प्रचण्डले रुकुमपश्चिमको मुसीकोट नगरपालिका १ बराहाटाकुरामा आयोजित एकता सन्देश सभालाई सम्बोधन गर्ने क्रममा आफू रुकुमपूर्वबाट चुनाव लड्ने करिब निश्चित भएको बताउनुभयो । 

उहाँले रुकुमका जनताको दुःख, सुखमा साथ दिन, काँधमा काँध मिलाएर एकाकर हुन आफु रुकुमबाटै चुनाव लड्ने सोच बनाएको उल्लेख गर्नुभयो । पार्टी एकतापछि पहिलो पटक आयोजना भएको एकता सन्देश सभामा उहाँले रुकुमको विकासलाई नयाँ शिराबाट निर्माण गर्न चाहेको बताउनुभयो । 

तत्कालिन माओवादी केन्द्रका नेता जनार्दन शर्माको गृह जिल्ला समेत रहेको रुकुमपश्चिममा पुगेर प्रचण्डले जनार्दनले कम्युनिष्ट र माक्र्सवाद ल्यागेर धोका दिएको आरोप लगाउनुभयो । जनार्दनले गल्ति गरेकोले युवा नेता गोपाल शर्मालाई उम्मेदवार बनाएर अघि सारेको र रुकुमका जनताले पार्टीको विचार, सिद्धान्तलाई जिम्मेवारीपूर्वक पुरा गर्ने नेता पाएको उहाँको भनाई छ । 

सभामा प्रचण्डले विगतमा भन्दा रुकुमका जनता पार्टी प्रति थप जिम्मेवार बनेर महानता देखाएको र भगौडाको पछि लाग्दैनन् भनेर प्रमाणित गरेको बताउनुभयो । उहाँले मध्यपहाडी लोकमार्ग अभियानको बेला आफूले केहि नेता पलायन भएतापनि रुकुमका जनता पार्टीको सिद्धान्त र विचारबाट विचलित हुँदैनन् भनेको कुरा स्मरण गर्दै एकताबद्ध, क्रान्ति र पार्टी नेतृत्वको साथमा रुकुम उभिएको बताउनुभयो । प्रगतिशिल लोकतान्त्रिक पार्टी गठन गरेर नयाँ पार्टीमा लाग्नुभएका नेता जनार्दन शर्मालाई लक्षित गर्दै उहाँले रुकुमेलीहरु पलायनवादी, अराजकतावादी, पाखण्डीका पछि नलागेको उल्लेख गर्नुभयो । 

कार्यक्रममा स्वागत गर्नेको ताँति र विशाल जनमत देखेर उहाँले रुकुमका जनताले जनयुद्ध, जनआन्दोलनका बेला अग्रणी सिपाहीको भुमिका निर्वाह गरेको समेत बताउनुभयो । उहाँले वर्तमान समयमा देशको परिस्थिती अलि असहज र असाधारण भएकोले १७ बाम घटक दलहरुले मिलेर अहिले अवस्थलाई सहजतामा पैदा गर्ने ताकत निर्माण गरिरहेको बताउनुभयो । 

कार्यक्रममा पार्टीका सहसंयाजेक एवम् पूर्व प्रधानमन्त्री माधव कुमार नेपालले क्रान्तिकारी एकताको अभियानले देशभर उत्साह, भरोसा र उमंग पैदा भएको बताउनुभयो ।

उहाँले केहि प्रतिक्रियावादीहरुले पार्टीका बिरुद्ध बिषबमन गरिरहेको उल्लेख गर्नुहँदै विचलित नहुन आग्रह गर्नुभयो । नेकपाप्रति जनताको आशा र भरोसा जागेको हुनाले परिवर्तनकामी शक्तिहरु एकढिक्का हुन उहाँले आह्वान गर्नुभयो । कार्यक्रममा सहसंयोजक नेपालले पार्टी एकताबाट पन्छिएर गएकाहरुलाई राम राम भन्न सकिने काँध थाम्न नसकिने बताउनुभयो ।