रुकुम पश्चिममा प्रचण्ड र माधव नेपालले सम्बोधन गर्ने सभामा दश हजार बढी कार्यकर्ता उतार्दै नेकपा 

नेपाली कम्युनिष्ट पार्टी (नेकपा) रुकुम पश्चिमले पुस २६ गतेका दिन रुकुम पश्चिममा बृहत एकता सन्देश सभा कार्यक्रम गर्ने भएको छ । 

बुधबार पत्रकार सम्मेलन आयोजना गरेर नेकपाले एकता सन्देश सभाको बारेमा जानकारी गराएको छ । कार्यक्रममा नेकपाका जिल्ला ईन्चार्ज बसन्त शर्माले दुई पूर्व प्रधानमन्त्रीहरु पार्टीका संयोजक पुष्पकमल दाहाल प्रचण्ड र सहसंयोजक माधव कुमार नेपालले सभालाई सम्बोधन गर्ने कार्यक्रम तय भएको जानकारी दिनुभयो । 

शर्माका अनुसार बामघटक दलहरुको बृहत एकतापछि जिल्लामा पहिलो पटक हुने बिशाल सभाको तयारी तिब्र रुपमा भईरहेको छ । उहाँले मुसिकोट नगरपालिका १ को बराहाटाकुरामा सभा हुने र सभामा दश हजार बढी कार्यकर्ताहरु सहभागी हुने गरी तयारी भईरहेको बताउनुभयो । जसको लागि वडास्तरबाटै तयारी र प्रचारको काम भईरहेको उहाँको भनाइ छ । 

जिल्ला ईन्चार्ज शर्माले बामपन्थी एकताको पक्षमा रुकुमको ऐक्यबद्धता देखाउन, पार्टीको धारण जनतामास स्पष्ट पार्न र आगामी प्रतिनिधि सभाको चुनाव लक्षित पार्टीको धारणा सार्वजनिक गर्न सभा आयोजना गरिएको बताउनुभयो । 

कार्यक्रममा उहाँले तत्कालिन माओवादी केन्द्रका नेता जनार्दन शर्माले आम जनता र कम्युनिष्ट आन्दोलनलाई धोका दिएर एकता प्रक्रियाबाट पन्छिएकोले रुकुम जिल्ला व्यक्ति भन्दा विचारकै पक्षमा उभिएको सन्देश प्रवाह हुने जनाउनुभयो । पत्रकार सम्मेलनमा शर्माले भन्नुभयो, “रुकुमको कम्युनिष्ट आन्दोलनलाई देश भित्र र बाहिरबाट चासो पूर्वक हेरिएको र रुकुम कम्युनिष्टकै किल्ला रहेको साबित हुने छ । गोपाल शर्मालाई हामीले निर्विकल्प प्रतिनिधि सभा उम्मेदवार बनाएर कम्युनिष्ट एकताको पहिलो सन्देश दिईसकेका छौ ।”

कार्यक्रममा प्रतिनिधि सभा सदस्यमा नेकपाबाट एकल रुपमा सिफारिस हुनुभएका गोपाल शर्माले विगतको विरासत जोगाउन नेकपा सफल हुने बताउनुभयो । उहाँले जिल्लाका सर्वमान्य नेता जनार्दन शर्माले पार्टी छोडेपछि विकल्पमा जानु परेको र उक्त जिम्मेवारी आफूले ग्रहण गरेको उल्लेख गर्नुभयो ।  

पत्रकार सम्मेलनको सञ्चालन प्रेस सेन्टर नेपालका जिल्ला संयोजक प्रचण्ड खत्रीले गर्नुभएको थियो ।