नेपाली कांग्रेस मुसिकोटको सभापतिमा तीन जनाको दावी 

नेपाली कांग्रेसले देशभर वडा देखि केन्द्रीय समिति सम्मको नयाँ नेतृत्व चयनका लागि कार्यतालिका सार्वजनिक गरेसँगै जिल्ला जिल्लामा अधिवेशनको माहोल तातिन थालेको छ । 

यसैबिच रुकुम पश्चिमको जिल्ला सदरमुकाम समेत रहेको मुसिकोट नगर समितिको सभापतिमा तीन जनाले दावी प्रस्तुत गर्नुभएको छ । 

नगर सभापति पदमा मुसिकोट नगरपालिका वडा नम्वर १ निवासी ज्ञानु चन्द्र चन्द, वडा नम्वर २ निवासी दिनेश खड्का र वडा नम्वर ४ निवासी सुर्य प्रकाश शर्माले नगर सभापतिमा उम्मेदवारी दिने बताउनुभएको छ । 

सभापति पदमा आकांक्षी चन्द वडा नम्वर १ को वडा अध्यक्ष हुनुहुन्छ । पार्टीको क्षेत्रिय प्रतिनिधी रहनुभएका उहाँले सबैको साथ पाएर सहमतीमै सभापति हुने विचार रहेको उल्लेख गर्नुभयो । 

नगर सभापतिका आकांक्षी खड्का वडा नम्वर २ को वडा अध्यक्ष हुनुहुन्छ । उहाँले यसअघि पनि आफूले सभापतिमा दावी गरेतापनि सहमतिको वातावरण निर्माणको लागि उम्मेदवारी फिर्ता लिएको जानकारी दिनुभयो । खड्काले यसपटक आफू भए सहमतिमार्फत, नभए चुनावमै पनि भिड्ने तयारीमा रहेको बताउनुभयो । 

सभापतिका अर्का आकांक्षी शर्मा वर्तमान नगर समितिको सचिव हुनुहुन्छ । मुसिकोट नगर प्रमुखको सचिवालयमा कार्यरत उहाँले पार्टी र स्थानीय सरकारको कामको अनुभव लिएको हुनाले सभापति पदमा उम्मेदवारी दिने बताउनुभयो । जेनजी आन्दोलनको मर्म, युवाहरुले नेतृत्वको अवसर पाउनुपर्ने, पार्टीमा फरकपन दिन सक्ने नेतृत्वको आवश्यकता रहेकोले आफूले सभापति पदमा दावी गरेको उल्लेख गर्नुभयो । 

पुस १६ गतेदेखी वडास्तरको अधिवेशनको कार्यतालिका सार्वजनिक गरेको कांग्रेसले अहिले क्रियाशिल सदस्यताको टुंगो लगाउने क्रममा रहेको जनाईएको छ  ।