रूकुम पश्चिमका चार जना रास्वपाको प्रदेश समितिमा मनोनित

राष्ट्रिय स्वतन्त्र पार्टी (रास्वपा) को कर्णाली प्रदेश समितिमा रूकुम पश्चिमबाट चार जना मनोनित भएका छन्।

रास्वपाका जिल्ला उपसभापति रिम प्रसाद शर्माका अनुसार जिल्लाबाट सिफारिस भएका चार जनालाई प्रदेश समितिको जिम्मेवारी प्रदान गरिएको हो ।
दुई जनालाई प्रदेश समिति सदस्य र दुई जनालाई समितिको दुई विभागमा मनोनित गरिएको हो ।

उपसभापति शर्माले चौरजहारी नगरपालिका १ निवासी शिव कुमार शर्मा र बाँफिकोट गाउँपालिका ३ निवासी दोर्ण खड्कालाई कर्णाली प्रदेश समितिको सदस्य पदमा मनोनित गरिएको बताउनुभयो ।

त्यसैगरी त्रिवेणी गाउँपालिका ९ निवासी निर्मल कुमार चन्दलाई कर्णाली प्रदेश समितिको मानव संशाधन तथा प्रवर्द्धन विभाग सदस्य र आठबिसकोट नगरपालिका ९ निवासी केशव जङ्ग मल्ललाई प्रदेश समितिको संगठन विभाग सदस्यमा मनोनित गरिएको छ ।

गत भदौ ११ गते जिल्ला कार्य समितिले उहाँहरुलाई प्रदेश समितिमा सिफारिस गरेको थियो । सोही सिफारिसको आधारमा उहाँहरुलाई प्रदेश समितिमा मनोनित गरिएको रास्वपाका प्रदेश समिति महामन्त्री ललित चन्दले जानकारी दिनुभयो ।