मुसिकोट ६ मा पूर्व जनमुक्ति सेना र जेष्ठ कम्युनिष्ट सदस्यहरु सम्मानित

रुकुम पश्चिमको मुसिकोट नगरपालिका ६ मा पूर्व जनमक्ति सेना र जेष्ठ कम्युनिष्ट सदस्यहरुहरुलाई सम्मान गरिएको छ । नेपाली कम्युनिस्ट पार्टी (साबिक नेकपा माओवादी केन्द्र) ६नम्वर वडा समितिले सोहि वडा निवासी पूर्व जनमुक्ति सेना र जेष्ठ कम्युनिष्ट सदस्यहरुलाई सम्मान गरेको हो । 

नेपाली कम्युनिस्ट पार्टी (साबिक नेकपा माओवादी केन्द्र) मुसिकोट नगर समितिका सचिव अनिल बुढाका अनुसार चार जना पूर्व जनमुक्ति सेना र तीन जना जेष्ठ कम्युनिष्ट सदस्यहरुलाई सम्मान गरिएको हो । 

सोहि वडा घर भई जनयुद्धमा होमिनु भएका पुर्व जनमुक्ति सेनाहरु दिपक बोहरा, रामचन्द्र पाण्डे, राम बहादुर बुढा र राजेश रावल र जेस्ठ कम्युनिष्ट सदस्यहरु गम्मरसिं बोहरा, डिल्ली बहादुर बोहरा र युद्दबिर बोहरालाई दोसल्ला र अबिर लगाएर सम्मान गरिएको हो । नेपाली कम्युनिस्ट पार्टी (साबिक नेकपा माओवादी केन्द्र) ६ नम्वर वडा समितीको प्रथम बिस्तारित बैठक तथा अन्तरक्रिया कार्यक्रमको अवसरमा उहाँहरुलाई सम्मान गरिएको हो । 

नगर सचिव बुढाका अनुसार साविक नेकपा माओवादी केन्द्र मुसिकोट नगरपालिका वडा नम्वर ६ को सिङ्गो वडा समितिले पार्टी एकताको समर्थन गर्दै नेपाली कम्युनिष्ट पार्टीमा आवद्ध हुने निर्णय गरेको छ । शुक्रवार सम्पन्न वडा समितिको प्रथम विस्तारित बैठकले टुटफुट र विभाजनलाई अस्वीकार गर्दै प्रचण्डको नेतृत्वमा बनेको नेपाली कम्युनिष्ट पार्टीमा आवद्ध हुने निर्णय गरेको हो । 

वडा समितिको विस्तारित बैठकले पदाधिकारी हेरफेर गर्दै दीपक बोहोरालाई अध्यक्षको जिम्मेवारी दिएको छ । वडा समिति २२ सदस्यीय निर्माण गरिएको छ । वडा समितीका उपाध्यक्षमा बालाराम केसी,सचिव मदन मल्ल, सहसचिव एक्क बहादुर महतरार कोषाध्यक्षमा जानकी केसी रहनुभएको छ । 

बैठकमा नेपाली कम्युनिष्ट पार्टीका नेता एवम् साबिक माओवादी केन्द्रमा जिल्ला संयोजक गोविन्द रोका सचिनले कतिपय नेताहरुले वैचारिक रुपमा विचलित हुँदै क्रान्तिकारी जनतालाई धोका दिएर पार्टी छोडेपनि रुकुमेली जनता रत्तिभर विचलित नभएको बताउनुभयो । एकाध नेताहरुले पार्टी छोड्दैमा रुकुमेली जनता र कार्यकर्ताहरु उनीहरुको पछि नलागेको गर्विलो इतिहास स्मरण गर्दै रोकाले जिल्लामा पार्टीको जितको विरासत जोगाउने अठोट व्यक्त गर्नुभयो ।

नेता बुद्धि प्रसाद शर्माले जनार्दनलाई रुकुमेली जनताले लगातार २० वर्ष सत्तामा पुर्याएको र पार्टीले पनि पटक पटक शक्तिशाली मन्त्रालयको जिम्मेवारी दिएको भन्दै आफूलाई पुगिसकेपछि अरुलाई धोका दिएको टिप्पणी गर्नुभयो । पदमा रहँदा राम्रै काम गरेको भएपनि जनार्दनले अहिले पार्टी छोडेर शहीद, घाइते, अपाङग र जनताका सपनामा घात गरेकोले आफूहरु उनको पछि नलागेको शर्माको भनाइ थियो ।

पार्टीका मुसिकोट नगर समिति अध्यक्ष धनबहादुर खड्का वसन्तले गल्ती गर्ने नेताहरुको पछाडि मुसिकोटवासी जनता कहिल्यै नलागेको र अब झन गैर कम्युनिष्ट पार्टीमा जाने अवस्था नै नरहेको विश्लेषण गर्नुभयो ।

दिपक बोहराको अध्यक्षता र अनिल बुढाको संचालनमा बैठकले सम्पन्न भएको हो ।