ढोरपाटनको यात्रा : प्राकृतिक सुन्दरतामा एक अविस्मरणीय दिन

मिति: कार्तिक ९ गते २०८२

बिहान ठीक ७:५० बजेतिर हाम्रो टोली छिप्रिदहबाट यात्रामा निस्कियो। जि.प्र.का.मा छोटो प्रस्ताविक कार्यक्रमपछि ८ बजे औपचारिक रूपमा प्रस्थान गर्यौं। ९:२२ मा लुगुम चेकपोष्ट पुगेका हामीले सामान्य चेकजाँच प्रक्रिया पूरा गरी १०:१८ मा बाग्लुङ सिमानामा प्रवेश गर्‍यौं।

त्यहाँको चिसो हावासँगै उत्साह अझ प्रफुल्लित भयो। सिमानाबाट १०:३० बजे अघि बढ्दै ११:४५ मा बुर्तिबाङ बजार प्रवेश गर्‍यौं। बजारमा नरोकिएर सीधा उत्तरतिरको कच्ची सडक समात्यौं | उकालो, घुमाउरो र कतैकतै उपडखापड बाटोले यात्रा रोमाञ्चक बनाइरहेको थियो।

करिब २:० बजे हामी ढोरपाटन नगरपालिका–९, दुवाल पुग्यौं र त्यहाँ नास्ता खायौं। छोटो विश्रामपछि पुनः यात्रा सुरु गर्‍यौं। हरियाली वनजङ्गल र छरिएका गाउँवस्तीहरू पार गर्दै देडराली भञ्ज्याङ पुगेका थियौं। बाटो कठिन भए पनि वरिपरिको प्राकृतिक दृश्यले थकान हराउँथ्यो।

बेलुकी ठीक ४ बजे हामी श्री दुर्गा भञ्जन गुल्म सुरक्षा सेवा मु. पोष्टमा आइपुग्यौं। त्यहाँबाट देखिने ढोरपाटन उपत्यका साँच्चिकै मनमोहक दृश्य थियो। सुदूर क्षितिजसम्म फैलिएको हरियो उपत्यका, बीचबाट सलल बगिरहेको सानो खोला, वरिपरिका पहाडहरूमा खेलिरहेको घामको झलमल सबैले हामी सबैको मन छोयो |

सैनिक चेकपोष्टमा हाम्रो १५ जनाको समूह दर्ता गरी प्रवेश शुल्क तिरेर उपत्यकाभित्र पस्यौं। सैनिक पोष्टको प्रवेश द्वारमै केही तस्बिरहरू मोबाइल क्यामरामा कैद गर्यौं | त्यो क्षण सदैव सम्झनलायक बन्यो।

त्यसपछि चिसो वातावरणमा रमाउँदै हामी ढोरपाटन उपत्यकातर्फ अघि बढ्यौं। उपत्यकाबिचको हरियाली चैौरमा घोडा सयरमा मस्त पर्यटकहरू, सलल बग्ने खोला, र पहाडमाथि चढ्दै गरेको घामको दृश्यले सारा थकान भुलायो। हामी पनि त्यसै घामलाई पच्छ्याउँदै उपत्यका छिचोल्यौं।

छिरिङ लामा साहुजी हामीलाई लिन बाइकमा आधा बाटो आउनुभयो। उहाँको पछिपछि हामी करिब साँझ ५ बजे उहाँकै होमस्टेमा पुग्यौं। साहुनीले तातोपानी, खाजानास्ता र हृदयस्पर्शी आतिथ्यताले स्वागत गर्नुभयो।

साना झुपडीहरूमा टेबल–कुर्सी, खानपान र बैद्धमार्गी ध्वजापताकाले सजाइएको त्यो ठाउँ साँच्चिकै मनमोहक थियो। साँझको चिसो मौसममा तातो खाना र मिठो आतिथ्यले दिनभरको यात्रालाई पूर्ण बनायो।

त्यो रात ढोरपाटनको सुन्दरता, शान्त वातावरण र आत्मीय आतिथ्यका साथ बित्यो - एउटा अविस्मरणीय अनुभूति, जसले यात्राको अर्थलाई नयाँ परिभाषा दियो।