भदौ ८ गते लुम्बिनी प्रदेशका ६ जिल्लामा सार्वजनिक बिदा

लुम्बिनी प्रदेश सरकारले भदौ ८ गते आइतबार लुम्बिनी प्रदेशका ६ वटा जिल्लामा सार्वजनिक बिदा दिने भएको छ । प्रदेश सरकारले थारू समुदायको बसोवास धेरै रहेका ६ जिल्लामा बर्का अट्वारी पर्वको अवसरमा सार्वजनिक बिदा निर्णय गरेको हो ।

प्रदेशका दाङ, बाँके, बर्दिया, कपिलवस्तु, रूपन्देही र पश्चिम नवलपरासीमा सार्वजनिक बिदा दिइने आन्तरिक मामिला तथा कानुन मन्त्रालयले सार्वजनिक गरेको छ । थारू समुदायमा बर्का अट्वारी पर्व हर्षोल्लासका साथ मनाइन्छ । यस वर्ष यो पर्व ८ गते आइतबार परेको छ ।

यो पर्वमा थारू समुदायका पुरुषहरू उपवास ‘ब्रत’ बस्ने चलन छ । यो पर्वमा निराहार व्रत बसी सूर्यको पूजा गरी मनाइने धार्मिक मान्यता छ ।

पौराणिक कथाअनुसार भीमको पूजा गरेर पनि अट्वारी पर्व मनाउने प्रचलन छ । कुशे औंसीपछिको पहिलो आइतबार यो पर्व मनाउने गरिन्छ ।