मध्यरातमा दुर्गम गाउँ पुगेर जसले एकै परिवारका ६ जनाको ज्यान बचाए ...

घटना गएराती हो । रातको १२ बजे पुथा उत्तरगंगा गाउँपालिकाका प्रमुख प्रशासकीय अधिकृत ध्रुव बिकको मोबाईलमा घण्टी बज्यो । मध्यरातमा आएको फोन कलले झसङग हुनुभएका उहाँलाई पालिकाको स्वास्थ्य शाखाका सहसंयोजक कलिभान बिष्टले फोनले त्रसित बनायो । 

मध्य रातमा आएको फोनले पक्कै केहि अप्ठ्यारो अवस्था आएको अनुमान थियो । हतास र डर मिश्रित स्वरमा बिष्टले भन्नुभयो, “जङगली च्याउ खाएका वडा नम्वर ११ दमचन गाउँका ६ जना गम्भिर अवस्थामा छन्, तुरुन्तै रुकुमकोट पुर्यानुपर्छ, नत्र अवस्था गाह्रो छ ।”

यो फोन बिष्टले दमचनबाट करिब चार किलोमिटर टाढाको सेरा गाउँमा आएर गर्नुभएको थियो । दमचनमा नेटवर्क थिएन । 

प्रमुख प्रशासकीय अधिकृतले तत्काल एम्बुलेन्सको खोजी गर्नुभयो । बाटो अवरोध रहेकोले जेसिबी पनि तयारी अवस्थामा राख्नुभयो ।  

कलिभान भने मध्यरातमा सेराबाट गाडि लिएर फेरि गमचन पुग्नुभयो । उहाँको साथमा उहाँको श्रीमती जानकी गिरी हुनुहुन्थ्यो । गिरी पनि स्वास्थ्यकर्मी हुनुहुन्छ । उहाँ आधारभूत स्वास्थ्य इकाई दमचनमा कार्यरत हुनुहुन्छ । 

दुबै जना स्वास्थ्यकर्मी भएकोले गम्भिर अवस्थाको खबर सुन्नेबित्तिकै बिरामीको घरमा जान उहाँहरुलाई हतार भयो । बर्षाको रातको पर्वाह नगरी बिरामीको घरमा पुग्नु भएका कलिभान र जानकीले रातभर उनीहरुलाई उपचार गर्नुभयो, र निकाे पार्नुभयाे ।

बिष्टले घटनाबारे मूलपाटीसँग भन्नुभयो, “करिब नौ बजे खाना खाएपछि उहाँको परिवारमा बान्ता गर्ने, रिंगाटा लाग्ने समस्या देखिएछ । घरका एक जनाले च्याउ नखाएको हुनाले उहाँले नै हामीलाई खबर गर्नुभएको हो । हामी त्यहाँ पुग्दा ११ बजेको हुँदो हो । ६० वर्षीया सुनमाया नेपाली, ३३ वर्षीया भारती बिक, २८ वर्षीया लहरपुरी बिक, २३ वर्षीय मिलन सेर्पाली, ७ वर्षीय आकार सेर्पाली र ५ वर्षीय प्रशंसा बिक बिरामी हुनुहुन्थ्यो । उहाँहरुको मुखबाट फिँज निकाल्नुका साथै बेहोस अवस्थामा हुनुहुन्थ्यो । ”

बिष्टले थप्नुभयो, “सकेको र जानेको सबै उपचार गर्यौ । अवस्था झन् गाह्रो हुँदै गएपछि सेरा गएर गाडि लिएर आयौ । तर मध्यरातमा सदरमुकाम लैजान सजिलो थिएन । बाटोमै केहि भयो भने ठुलो क्षति हुन्छ भन्ठानेर दुबै जना हरेश नखाएर निरन्तर उपचारमा लाग्यौ । सलाईन पानी चढाउने, मुखबाट फिँज निकाल्ने, वान्ता गराउने, कृत्रिम अक्सिजन दिने, न्यानो राख्ने जस्ता सबै कार्य गर्यौ । औषधि पनि खुवायौ । दुई बजेपछि सबैलाई होस् आयो । नआत्तिएर सेवा गर्यौ । रातभर जागै बस्यौ, सबैलाई ठिक पारेर मात्र फर्कियौ ।”

बिष्ट दम्पतीको यो कर्मको अहिले उच्च प्रशंसा भईरहेको छ । गाउँपालिकाका प्रमुख प्रशासकीय अधिकृत बिकले जिल्ला सदरमुकाम पठाउन एम्बुलेन्स तयारी गरेर बसेको तर उहाँहरु घरमै गएर बिरामीको सफल उपचार गरेको बताउनुभयो ।

कर्तव्यनिष्ठ, मानवीय संवेदना र जिम्मेवारीबोधको उत्कृष्ठ उदाहरण कलिभान र जानकी भएको उहाँले उल्ेख गर्नुभयो । दुबै जनालाई गाउँपालिका कार्यालयमा बोलाएर सम्मान समेत गरिएको उहाँले जनाउनुभयो ।