मध्यपहाडीको रुकुम खण्ड एकतर्फी सञ्चालनमा

शनिबार रातीको अविरल बर्षापछि आएको पहिराेले अवरुद्ध मध्यपहाडि राजमार्गको रुकुम पश्चिम खण्डमा एकतर्फि यातायातका साधनहरु सञ्चालनमा आएका छन् । 

मुसिकोट नगरपालिका -८ को रिनदह नजिकै राजमार्गमा खसेको पहिरोले बाटो अवरुद्ध भएको थियो । 

मुसिकोट नगरपालिकाको जेसिबि लगाएर पहिरो पन्छाएपछि एकतर्फी यातायातका साधनहरु सञ्चालन भएको नगर प्रहरी ईन्चार्ज उमेश केसीले जानकारी दिनुभयो । 

उहाँका अनुसार सडक अवरुद्ध हुँदा लामो तथा छोटो दुरीका यातायातका साधनहरु दिनभर रोकिएका थिए । दिनभर जेसिबी लगाउँदा पनि पुरै पहिरो हटाउन नसकिएको तर एकतर्फि यातायातका साधनहरु सञ्चालन हुने गरी पहिरो पन्छाईएको ईन्चार्ज केसीले जानकारी दिनुभयो । 

वडा नम्वर ८ का वडा अध्यक्ष जय बहादुर थापा, नगर प्रहरी टोली र नेपाल प्रहरीको साँखसिथत प्रहरी पोष्टबाट खटिएको प्रहरी टोलीले पहिरो पन्छाउन मेहेनत गरेको थियो । 

एकतर्फि रुपमा यातायातका साधनहरु चलेपछि रुकुम पश्चिमबाट रुकुमपूर्व हुँदै काठमार्डौ जाने, रुकुम पूर्वबाट रुकुम पश्चिम हुँदै दांग, नेपालगञ्ज जाने सवारी साधनहरु सञ्चालनमा आएका छन् । 

वर्षा भईरहेकोले विभिन्न स्थानहरुमा पहिरो आउने जोखिम भने कायमै रहेको बताईएको छ ।