रुकुम पश्चिमका ६ स्थानीय तहको बजेट ३ अर्ब ६२ करोड बढी

रुकुम पश्चिमका छ वटा स्थानीय तहले आगामी आर्थिक वर्ष ०८२/०८३ का लागि तीन अर्ब ६२ करोड ८८ लाख ९६ हजार ५५० रुपियाँको बजेट ल्याएका छन् । चालु र पुँजीगत खर्च समेटिएको बजेट मार्फत सबै स्थानीय तहले सामाजिक विकास, पूर्वाधार निर्माण, भूकम्पपछिको पुनर्निर्माण, सेवा प्रवाहलाई प्राथमिकता दिएका छन् । 

चौरजहारी नगरपालिकाको २१ औँ नगर सभामा उपप्रमुख ईश्वरी शर्मा बिएमले पेश गर्नुभएको कार्यक्रम र बजेट पारित समेत भएको छ । चौरजहारीले कुल ८१ करोड ९४ लाख ८३ हजारको बजेट पारित गरेको हो । यो संघ संस्थाहरु समेतको बजेट हो । संघ संस्थाहरुको बाहेक संचित कोषको बजेट भने ५७ करोड ४१ लाख ९५ हजार २५ रुपियाँ रहेको छ । जसमध्य चालुतर्फ ७४.५९ प्रतिशत अर्थात ४२ करोड ८३ लाख १९ हजार ७८८ र पुँजीगततर्फ २५.४० प्रतिशत अर्थात १४ करोड ५८ लाख रहेको छ । 

मुसिकोट नगरपालिकाको १५ औँ नगर सभामा उपप्रमुख बिमलकुमार पुनले ६९ करोड ९९ लाख ९४ हजार २ सय रुपियाँको बजेट प्रस्तुत गर्नुभएको छ । जसमा चालु तर्फ ५२ करोड ७० लाख ९४ हजार २ सय अर्थात ७५.३० प्रतिशत रहेको छ भने पुँजीगत तर्फ १७ करोड २९ लाख अर्थात २४.७० प्रतिशत रहेको छ ।

त्यसैगरी आठबिसकोट नगरपालिकाको १८ औँ नगरसभा ७६ करोड ३८ लाख ६९ हजार रुपियाँको बजेट पेश भएको छ । नगर उपप्रमुख धनकुमारी शाहीले नीति तथा कार्यक्रम कार्यान्वयनका लागि चालु तर्फ ४९ करोड ३४ लाख ३२ हजार अर्थात ६४.६० प्रतिशत र पुँजीगत तर्फ २७ करोड चार लाख ३७ हजार अर्थात ३५.४० प्रतिशतको बजेट विनियोजन गरेको जानकारी दिनुभयो । 

त्रिवेणी गाउँपालिका उपाध्यक्ष राजुकमारी रेउलेले आगामी आर्थिक वर्ष ०८२/०८३ को लागि ५४ करोड ८६ लाख ३२ हजारको बजेट गाउँ सभामा पेस गर्नुगरेको छ । कुल बजेट मध्य चालु तर्फ ४१ करोड ५४ लाख ३२ रुपैयाँ अर्थात ७५.७२ प्रतिशत र पुँजीगत तर्फ १३ करोड ३२ लाख अर्थात २४.२८ प्रतिशत बजेट रहेको छ ।

सानीभेरी गाउँपालिकाको १७ औँ गाउँ सभामा उपाध्यक्ष कमला रोका पुनले ५३ करोड ९७ लाख छ हजार ९९९ रुपियाँ बजेट पेश गर्नुभएको छ । जसमध्य चालु तर्फ ३९ करोड ३३ लाख ९२ हजार ४ सय ३२ अर्थात ७२.८९ प्रतिशत र पुँजीगत तर्फ १४ करोड ६३ लाख १४ हजार ५ सय ६७ रुपैयाँ अर्थात २७.११ प्रतिशत रहेको छ ।

बाँफिकोट गाउँपालिकाको १८ औं गाउँ सभामा ५० करोड २५ लाख ७४ हजार ५६३ रुपियाँको बजेट पेश भएको छ । गाउँपालिका उपाध्यक्ष तारा बुढा केसीले उक्त अनुमानित बजेट पेश गर्नुभएको हो । कुल बजेट मध्य ३१ करोड ७५ लाख २५ हजार ६५५ रुपियाँ चालु तर्फ र १८ करोड ५० लाख ४८ हजार ९०८ रुपियाँ पुँजीगत तर्फको रहेको छ । 

सम्बन्धित समाचारहरु :