चौरजहारीमा आर्थिक सर्वेक्षणसहित ८२ करोडको बजेट

रुकुम पश्चिमको चौरजहारी नगरपालिकाले पहिलो पटक आर्थिक सर्वेक्षणसहितको कार्यक्रम तथा बजेट पेश गरेको छ । शनिबारदेखि सुरु भएको २१ औ नगरसभामा नगर उपप्रमुख ईश्वरी शर्मा बिएमले आगामी आर्थिक वर्ष ०८२/०८३ को लागि करिब ८२ करोडको कार्यक्रम तथा बजेट वक्तव्य पेश गर्नुभएको हो । 

बजेट वक्तव्य अनुसार चौरजहारी नगरपालिकाको आगामी आर्थिक वर्षको कुल बजेट ८१ करोड ९४ लाख ८३ हजार रहेको छ । संघ संस्थाहरुको बाहेक संचित कोषको बजेट भने ५७ करोड ४१ लाख ९५ हजार २५ रुपियाँको रहेको छ । बजेट वक्तव्य अनुसार चालुतर्फ ७४.५९ प्रतिशत अर्थात ४२ करोड ८३ लाख १९ हजार ७८८ र पुँजीगततर्फ २५.४० प्रतिशत अर्थात १४ करोड ५८ लाखको वजेट पेश भएको छ । 

आगामी वर्षको कुल अनुमानित बजेटको स्रोतमा आर्थिक ऐन, सहिद स्मृति नगर अस्पतालसहितको आन्तरिक राजस्व २ करोड ५९ लाख २० हजार प्रक्षेपण गरिएको छ । वक्तव्यमा संघ सरकारको समानीकरण अनुदान १० करोड २४ लाख, सशर्त अनुदान चालु तर्फ २४ करोड १० लाख, सशर्त अनुदान पुँजीगततर्फ ३१ लाख, समपूरक अनुदान पुँजीगत तर्फ एक करोड १७ लाख, विशेष अनुदान चालुतर्फ ८४ लाख र संघको राजस्व बाँडफाँड तर्फ नौ करोड ३५ लाख छ हजार प्राप्त हुने अनुमान गरिएको छ । 

त्यसैगरी राजस्व बाँडफाँड स्थानीय सरकारको दहत्तरबहत्तर शुल्क बापत ३० लाख र मालपोत रजिस्ट्रेशन शुल्क ३९ लाख गरी ६९ लाख राजस्व अनुमान गरिएको छ । कर्णाली प्रदेशको समानीकरण अनुदानतर्फ एक करोड ३२ लाख २१ हजार, सशर्त अनुदान चालुतर्फ १४ लाख १९ हजार र सशर्त अनुदान पुँजीगततर्फ एक करोड ९७ लाख परिचालन हुने उल्लेख गरिएको छ । यसका साथै प्रदेश सवारी साधनबाट १९ लाख २८ हजार २३७ रुपियाँ आय अनुमान गरिएको छ । 

पहिलो पटक आर्थिक सर्वेक्षण गरेर बजेट तयार पारिएको निमित्त प्रमुख प्रशासकीय अधिकृत शेरप्रसाद ढकालले जानकारी दिनुभयो । उहाँका अनुसार अघिल्ला वर्षहरुमा विनियोजन भएको बजेट र खर्चको विषयगत रुपमा कार्यान्वयनको अवस्था, प्रतिफल, आयात निर्यातको अवस्था, सुधार गर्नुपर्ने पक्षसहित अध्ययन गरेर नगरपालिकाले बजेट बनाएको हो ।

सरोकारवाला निकायहरुसहितको समिक्षा, बिश्लेषण र सुझावको आधारमा बजेट ल्याईएको ढकालले जनाउनुभयो । बजेट माथि भोलि सोमबारबाट छलफल हुने बताईएको छ । 

चौरजहारी नगरपालिकाको कार्यक्रम तथा बजेटको पूर्ण विवरण :